SQO-daǵy sý tasqyny: «Qazaqstan halqyna» qory 100 úı salyp bermek

PETROPAVL. KAZINFORM – Soltústik Qazaqstan oblysynyń ákimdigi men «Qazaqstan halqyna» qory sý tasqynynan zardap shekken aýdandarda 100 turǵyn úı salý týraly memorandýmǵa qol qoıdy.

«Qazaqstan halqyna» qorynyń málimetinshe, turǵyn úıler daıyn ınjenerlik ınfraqurylymy men kommýnıkatsııalary bar «Solnechnyı – 2» shaǵyn aýdanynda júrgiziledi. Sondyqtan qurylys jumystaryn qysqa merzimde aıaqtaýǵa múmkindik bar.

Qurylys jumystarynyń kólemi men nysandar tizbesi aıqyndalǵannan keıin úlgilik jobalaý-smetalyq qujattama ázirlenedi, úlgilik jobany zardap shekken turǵyndarmen kelise otyryp, QR zańnamasy boıynsha keshendi saraptama jáne basqa da ruqsat berý qujattamasy alynbaq.

SQO ákimdigi qurylysqa qajetti jerdi bólýmen qatar qurylys salýshy kompanııalardy, onyń ishinde avtorlyq jáne tehnıkalyq qadaǵalaý boıynsha qyzmet kórsetýshilerdi irikteý rásimin ótkizedi.
Barlyq kezeńder ashyq ótýi úshin monıtorıng júrgizýge oblys ákimdiginiń jumys tobyna jergilikti atqarýshy organ ókilderimen qatar táýelsiz saraptamalyq (baǵalaý) qurylymdarynyń ókilderin jáne qoǵamdyq uıymdardy qosý usynyldy.

Buǵan deıin Qordyń Qamqorshylyq keńesi elimiz boıynsha úılerdiń qurylysyna 10 mlrd teńge bólý týraly sheshimdi bekitti. Qosymsha, bul maqsatqa 1-30 sáýir aralyǵynda erikti qaıyrymdylyqtan jınalǵan qarajat baǵyttalady. 24 sáýirdegi aqparat boıynsha Qordyń shottaryna 2,9 mlrd teńge túsken.

Buǵan deıin Petropavlda sý tasqynynyń ekinshi tolqyny bastalǵanyn aıtqan edik.