SQO-daǵy sý kásipornynyń 51 paıyz úlesi memleketke qaıtaryldy
PETROPAVL. KAZINFORM – Soltústik Qazaqstan oblysy Maǵjan Jumabaev aýdanyndaǵy Býlaevo qalasy turǵyndaryn sýmen qamtamasyz etetin kásiporynnyń 51% úlesi memleket menshigine qaıtaryldy.
SQO prokýratýrasynyń málimetinshe, vedomstvo turǵyn úı-kommýnaldyq sharýashylyq jáne memlekettik múlikti paıdalaný salasyndaǵy zańdylyqtyń jaı-kúıine taldaý júrgizgen. Onyń qorytyndysy boıynsha aýdan prokýratýrasy 2017 jylǵy elektrondyq aýktsıonnyń nátıjelerin jáne «Býlaev sý» JShS jarǵylyq kapıtalyndaǵy 51% úlesti satyp alý-satý shartyn jaramsyz dep taný týraly sotqa talap aryz berdi.
Sotta prokýror «AUHAL» JShS úlesti satyp alǵannan keıin kásiporyn qyzmetine is júzinde qatyspaǵanyn jáne sý qubyry jelilerin kútip-ustaý men damytýǵa qajetti qarajat salmaǵanyn dáleldedi.
Al sý qubyry jelilerin kútip-ustaý jáne apattyq-qalpyna keltirý jumystaryna qajet qarajat Maǵjan Jumabaev aýdany ákimdiginiń bıýdjeti men resýrstary esebinen jumsalǵan.
Osynyń saldarynan Býlaevo qalasynyń turǵyndaryn sýmen qamtamasyz etetin kásiporyn kúrdeli qarjylyq jaǵdaıǵa tap boldy.
SQO mamandandyrylǵan aýdanaralyq ekonomıkalyq soty prokýratýranyń talap aryzyn qanaǵattandyrdy. Nátıjesinde 2017 jylǵy elektrondyq aýktsıon nátıjeleri jáne «Býlaev sý» JShS jarǵylyq kapıtalyndaǵy 51% úlesti satyp alý-satý sharty jaramsyz dep tanyldy.
Sot sheshimimen Býlaevo qalasynyń turǵyndaryn sýmen qamtamasyz etýge arnalǵan múlik memleketke qaıtaryldy.
Prokýratýranyń málimetinshe, memlekettik múliktiń qaıtarylýy kásiporyndy tıimdi basqarýǵa, onyń qyzmetine baqylaýdy kúsheıtýge, sý qubyry jelilerin jańǵyrtýǵa qajetti resýrstardy baǵyttaýǵa jáne kommýnaldyq qyzmetterdiń sapasyn arttyrýǵa múmkindik beredi.
Buǵan deıin Qazaqstanda 75,7 mlrd teńgeniń zańsyz ıemdenilgen jyljymaıtyn múlki memleketke qaıtarylǵanyn jazǵan edik.
