SQO-daǵy Shalqar-Imantaý jańa týrıstik maýsymǵa daıyn ba
PETROPAVL. KAZINFORM — Soltústik Qazaqstan oblysyndaǵy Shalqar-Imantaý kýrorttyq aımaǵy úsh aptadan keıin demalýshylardy qabyldaýdy bastaıdy.
Jazǵy týrıstik maýsym qarsańynda oblys ákimi Ǵaýez Nurmuhambetov demalys aımaǵynyń daıyndyǵyn kórdi.
Shalqar-Imantaý — SQO-daǵy eń suranysqa ıe demalys oryndarynyń biri. Tabıǵaty tamyljyǵan, týrıstik áleýeti joǵary bul aımaq jyldan-jylǵa jaqsaryp, damyp keledi.
— Memleket basshysy atap ótkendeı, ishki týrızmdi damytý — óńirlik ekonomıkanyń mańyzdy basymdyqtarynyń biri. Sońǵy eki jylda Shalqar kóli jaǵalaýynda 21 shaqyrym jol salyndy, bul baǵytta jumys áli de jalǵasady. Byltyr 5,2 shaqyrym talshyqty-optıkalyq baılanys jelisi tartylyp, 7 týrıstik nysan iske qosyldy, aldaǵy jospar qosymsha 12 shaqyrymdy qosý, — deıdi óńir basshysy.
Qazirgi tańda Aıyrtaý aýdanynda 44 demalys bazasy jumys isteıdi. Kýrorttyq maýsymǵa daıyndyq aıasynda arnaıy jumys toby qurylyp, demalýshylardyń qaýipsizdigi men jaılylyǵy basty nazarǵa alynǵan. Ótken jyldan beri munda modýldik qutqarý stantsııasy jumys istep, týrıstik polıtsııanyń kezekshiligi uıymdastyrylǵan.
Buǵan deıin Rıdderdegi taý shańǵy kýrorty keńeıtiletinin jazǵan edik.
