SQO-daǵy Shahovskoe aýylynda úı qustarynyń neden qyrylǵany anyqtaldy
PETROPAVL. KAZINFORM – Soltústik Qazaqstan oblysy Qyzyljar aýdanynyń Shahovskoe aýylynda myńdaǵan úı qusynyń qyrylýyna ne sebep bolǵany belgili boldy. Mamandar qustardan koktsıdıoz aýrýyn anyqtady.
SQO Veterınarııa basqarmasynyń málimetinshe, qus qyrylǵannan keıin Qyzyljar aýdandyq veterınarııalyq stantsııasynyń mamandary oqıǵa ornynan bıologııalyq materıal, jem jáne sý synamalaryn aldy. Ol Petropavldaǵy oblystyq veterınarııalyq zerthanaǵa jáne Astanadaǵy Veterınarııa boıynsha ulttyq referenttik ortalyqqa jiberildi.
Zertteý nátıjeleri boıynsha joǵary patogendi qus tumaýy anyqtalǵan joq. Sondaı-aq Nıýkasl aýrýy, salmonellez jáne pasterellez qozdyrǵyshtary da tabylmady.
29 qyrkúıekte oblystyq veterınarııalyq zerthana bıologııalyq materıaldy zertteý nátıjelerin aldy, soǵan sáıkes qustardyń koktsıdıozy anyqtaldy.
Mamandardyń aıtýynsha, koktsıdıoz – qustardyń as qorytý júıesin zaqymdaıtyn parazıttik aýrý. Onyń taralýyna qustardyń tyǵyz ornalasýy, sanıtarııalyq jaǵdaıdyń saqtalmaýy jáne kútim erekshelikteri áser etýi múmkin.
Shahovskoe aýylynda osy kúnge deıin 28 jeke qosalqy sharýashylyqtyń 15 537 qusy qyryldy. Onyń ishinde 15 myńǵa jýyǵy qaz, 522 taýyq, 44 kúrketaýyq, 50 shaqty úırek bar.
Esterińizge salaıyq, Shahovskoe aýylynda úı qazdary belgisiz aýrýdan qyrylyp jatqanyn jazǵan edik.
