SQO-daǵy Sergeevka sý qoımasynda sý deńgeıi byltyrǵydan 86 sm artyq

PETROPAVL. KAZINFORM – Soltústik Qazaqstan oblysyndaǵy baqylaý pýnktteri qar jamylǵysyn jıi baqylaýǵa kóshti.

«Qazgıdromet» RMK SQO fılıalynyń málimetinshe, sońǵy monıtorıng 15 aqpanda júrgizildi. Qazir oblys boıynsha qar jamylǵysynyń ortasha bıiktigi 9-40 sm shamasynda, bul - oblystyń kóp bóliginde normaǵa jaqyn. Ýálıhanov jáne Ǵ. Músirepov atyndaǵy aýdandarda, Shal aqyn aýdanynda qar qalyńdyǵy normadan 10-21 sm asady.

SQO aýmaǵy boıynsha qardaǵy sý qory 18-den 100 mm-ge deıin, oblystyń kóp bóliginde ortasha kópjyldyq mánderge jaqyn, norma 33-70 mm.

Al óńirdiń ońtústik-shyǵys jáne ońtústik-batys bólikterinde qardyń sýmen qanyǵýy normadan 40-75% artyq.

Bıyl ózender men kólderde sý mol. Máselen Sergeev sý qoımasyndaǵy sý deńgeıi 802sm jetken, bul ótken jylǵy mánderden 86 sm artyq. Sý qoımasy 101% tolǵan.

Petropavl mańyndaǵy Esil ózeninde sý deńgeıi 265 sm, bul 2024 jyldan 22 sm-ge artyq.

Muzdyń qalyńdyǵy Esil ózeniniń salalarynda 16-dan 80 sm-ge deıin, Esil ózeninde 25-ten 68 sm-ge deıin jetti. Byltyr osy kezde muzdyń qalyńdyǵy salalarynda 14-62 sm bolsa, Esil ózeninde 34 sm joǵary tirkelgen edi.

Aldaǵy kúnderi SQO aýmaǵyna tsıklon áser etedi. Saldarynan jeldiń ekpini 15-20 m/s deıin kúsheıip, boran turmaq. Aýa temperatýrasy kúndiz -3-8 gradýs aıaz, túnde synap baǵanasy -8-13 gradýsqa deıin tómendeıdi.

Buǵan deıin SQO Tótenshe jaǵdaılar departamentiniń bastyǵy Jomart Asqarov óńirdiń sý tasqynyna daıyndyǵy týraly aıtyp bergen edi.