SQO-daǵy Sergeev sý qoımasy 120 paıyzǵa tolyp, tasyp jatyr

PETROPAVL. KAZINFORM — Soltústik Qazaqstan oblysyndaǵy Sergeev sý qoımasy tasyp, bóget jotasynan asqan sý deńgeıi 111 sm-ge jetti. 

«Qazgıdromet» kásiporny oblystyq fılıalynyń málimetinshe, gıdrologııalyq toraptaǵy sý deńgeıi bir táýlikte 26 sm-ge joǵarylaǵan. Al Sergeevka qalasy janynda Esil ózeniniń deńgeıi 2 metr 7 sm kóterilip, 642 sm-ge jetti. Desek te, qaýipti deńgeıge deıin áli sonsha kerek.

Oblys aýmaǵynda Esil ózeni bastalatyn Ǵabıt Músirepov atyndaǵy aýdanda sý deńgeıi túsip jatyr. Shóptikól aýylynyń mańynda shamamen 1 metrge, Drýjba eldi mekeni janynda 38 sm-ge, Toqsan bı aýylynyń mańynda 20 sm-ge tómendedi. Shaǵyn ózenderde birneshe kúnnen beri sý deńgeıi túsip keledi.

Al Esil aýdanyndaǵy Pokrovka, Nıkolaevka eldi mekenderinde ózen sýynyń deńgeıi 85 sm-ge kóterilgen.

Mamandar 6-8 sáýir aralyǵynda Ǵabıt Músirepov, Shal aqyn Esil jáne Qyzyljar aýdandarynda sý deńgeıiniń áli de kóteriletinin eskertip jatyr.

Buǵan deıin Aqmola oblysynda sý tasqyny jaǵdaıy táýlik boıy baqylaýǵa alynǵanyn jazǵan edik.