SQO-daǵy Sergeev sý qoımasyndaǵy jaǵdaı kúrdelene tústi

PETROPAVL. KAZINFORM – Soltústik Qazaqstan oblysynda sý tasqynyna qatysty jaǵdaı kúrdelene tústi. Mamandardyń habarlaýynsha, 15 gıdrologııalyq bekettiń 5-eýinde sý deńgeıi qaýipti mejege jaqyn qaldy. Ekeýinde ózen tasyp jatyr. 

«Qazgıdromet» RMK SQO fılıalynyń málimetinshe, Sokolovka eldi mekeni mańynan ótetin Imanburlyq ózeni tasyp jatyr, qaýipti deńgeı 560 sm bolsa, qazir saǵat 16.00-degi deńgeıi 572 sm kórsetken. Tańǵy saǵat 8.00-den osy ýaqytqa deıin sý jarty metrge kóterildi.

Sergeev qalasy mańynan ótetin Esil ózeni deńgeıi de osy aralyqta birden 212 sm-ge artty. Qaýipti kórsetkish 1 500 sm bolsa, qazir 1 123 sm-ge jetken. 

Sergeev sý qoımasyndaǵy jaǵdaı da kúrdeli. Bógenniń erneýinen asyp tógilýi 2016 jylǵy aýqymdy sý tasqyny deńgeıinen asyp ketti. Osydan 8 jyl buryn sharyqtaý sheginde 200 sm-ge jetse, qazir 260 sm bıiktikte asyp tógilip jatyr. 

Oblystaǵy Sharyq, Babyqburlyq, Qamysaqty ózenderniń sýy da tolyǵyp jatyr. 

Esterińizge salaıyq, byltyr Sergeev sý qoımasy 8 sáýirde 196 sm-ge deıin kóterilip, sharyqtaý shegine jetti.

Buǵan deıin SQO-da ózender sýynyń kúrt kóterilýine baılanysty eskertý jarııalanǵanyn habarlaǵan edik.