SQO-daǵy Sábıt Muqanovtyń mýzeı-úıi jabylyp qaldy
PETROPAVL. KAZINFORM – Soltústik Qazaqstan oblysy Sábıt aýylyndaǵy jazýshynyń mýzeı-úıindegi jádigerler aýdan ortalyǵyna kóshirildi.
SQO Mádenıet, tilderdi damytý jáne arhıv isi basqarmasynyń málimetinshe, Sábıt Muqanovtyń qoldanǵan zattaryn, basqa da jádigerlerdi Presnovka eldi mekeninde ornalasqan Ivan Shýhovtyń mýzeı-úıi aýmaǵyndaǵy bir qabatty ákimshilik ǵımaratta tamashalaýǵa bolady.
- Sábıt aýylynan turǵyndardyń kóshýine baılanysty, sondaı-aq mýzeı qoryn saqtaý jáne ony tıisti jaǵdaıda ekspozıtsııalaý maqsatynda byltyr qazan aıynda aýdan ortalyǵyna kóshirildi. Bul sheshim – mádenı murany joǵaltpaı, ony saqtaýdyń balama joly. Ol jańa orynǵa beıimdelip, jumysyn jalǵastyryp jatyr, - deıdi basqarma basshysy Dosbol Ábdireıisov.
Jambyl aýdany Sábıt aýylynda jazýshynyń qurmetine 1990 jyly ádebı-memorıaldyq mýzeı-úıi ashylǵan bolatyn. Bul nysan óńirdiń kıeli jerleriniń kartasyna engen.
Qundy jádigerlerdiń kóbi Almatydan ákelingen. Qazir 700-den astam jádiger saqtalǵan. Olardyń ishinde japtama etigi, ózi ustaǵan dombyrasy, Quran kitaby, jaınamazy bar.
Óńirdegi basqa mýzeılerdiń jaǵdaıy ázirge turaqty. Máselen, Jambyl aýdany Jańajol aýylyndaǵy Ǵabıt Músirepov mýzeıi 1992 jyldan beri jumys isteıdi. Ǵımaraty apatty dep tanylǵan soń, ekspozıtsııasy Mádenıet úıine kóshirilgen. Qazir munda 500-den astam jádiger saqtaýly, jylyna 600-ge jýyq adam keledi.
Al M. Jumabaev aýdany Sarytomar aýylyndaǵy Maǵjan Jumabaev mýzeıi úsh jyl buryn jóndeýden ótip, qazir kelýshilerge qolaıly jaǵdaıda qyzmet kórsetip otyr. Munda da 600-den astam eksponat bar, jyl saıyn 700-ge jýyq adam keledi.
Esterińizge salaıyq, SQO-da jergilikti mańyzdaǵy tarıh jáne mádenıet eskertkishteri tizimine engen 12 mýzeı bar. Sonyń tórteýi — elimizdiń belgili aqyn-jazýshylaryna arnalǵan memorıaldy murajaılar.
