SQO-daǵy Prıbrejnoe men Teplıchnoe eldi mekenderinde tasqynǵa qarsy bóget turǵyzyldy

PETROPAVL. KAZINFORM – Soltústik Qazaqstan oblysynda bıylǵy kóktemdegi jaǵdaı qaıtalanbas úshin bógetterdi salý jáne nyǵaıtý jumystary qolǵa alyndy. Qazirgi ýaqytta eldi mekenderdiń mańynan salynǵan 8 bógettiń ekeýi daıyn tur.

SQO ákimi Ǵaýez Nurmuhambetov atqarylyp jatqan jumystyń barysyn jáne sapasyn tekserdi. Bul týraly áleýmettik jelidegi paraqshasynda jazdy.

«Petropavl men Qyzyljar aýdanyndaǵy qorǵanys bógetterin nyǵaıtý jáne keńeıtý jumystaryn tekserdim. Barlyǵy 8 bóget qamtyldy. Mindetti oryndaý úshin 158 tehnıka qoldanylyp, 1,5 mln tonna ınertti materıaldar jetkizildi. Bógetterdiń bıiktigi aıtarlyqtaı ulǵaıtyldy. Búginde Prıbrejnoe men Teplıchnoe aýyldarynda bógetter daıyn. Oblys ortalyǵyndaǵy jumystar aıaqtalýǵa jaqyn. Bul jumys mamandardyń qatysýymen ǵylymı negizde júrgizildi. Ǵalymdardyń aıtýynsha, bıylǵy tasqyn kezindegi sýdyń maksımaldy deńgeıi Baltyq bıiktik júıesi boıynsha 98,58 metrdi qurady. Jańa bógetterdiń bıiktigi artyǵymen jobalanyp, 101,2 metrge jetti, bul bolashaqta eldi mekenderdi sý tasqynynan senimdi qorǵaýǵa kepildik beredi», - dedi Ǵaýez Nurmuhambetov.

Buǵan deıin, SQO-da bógetterdi nyǵaıtýǵa 5 mlrd teńgege jýyq qarajat bólingenin jazǵan edik. Bul «Demeý» korporatıvtik qorynan jáne jergilikti bıýdjetten bólingen aqsha.

Esterińizge salaıyq, «Birlik» shaǵyn aýdanynda tasqynnan zardap shekkenderge arnalyp salynǵan úılerdiń sońǵy legi 15 qyrkúıekte saltanatty túrde paıdalanýǵa berildi.