SQO-daǵy paıdalanylǵan ýran kenishterinen zııan joq — mınıstrlik
PETROPAVL. KAZINFORM — Soltústik Qazaqstan oblysynyń aýmaǵynda qazirgi ýaqytta jumysy toqtaǵan bes ýran ken orny ornalasqan.
Onyń úsheýi — Grachevskoe, Kosachınnoe, Dergachevskoe ken oryndary — Aıyrtaý aýdany, qalǵan ekeýi Shoqpaq jáne Aqqan-Burlyq — Ǵabıt Músirepov atyndaǵy aýdannyń aýmaǵynda tur.
Toqsanynshy jyldary bul ken oryndarynyń jumysy toqtap, talan-tarajǵa tústi, qaýipti bolǵanyna qaramastan jergilikti turǵyndar qurylys materıaldaryn buzyp alyp, qorshaýlaryn temir synyǵyn qabyldaý pýnktterine ótkizdi. Shahtalar qaraýsyz qaldy.
Ekologııa jáne tabıǵı resýrstar mınıstrliginiń málimetinshe, qazir bul paıdalanylǵan ýran kenishterinen keler zııan joq.
— Bul nysandardyń konservatsııasy «Soltústik Qazaqstan oblysynyń ekologııalyq máselelerin keshendi sheshý jónindegi 2020-2025 jyldarǵa arnalǵan Jol kartasyna» engizilgen. Qazirgi ýaqytta ýran ken oryndaryn Ǵ. Músirepov jáne Aıyrtaý aýdandary ákimdikteri kommýnaldyq menshikke qabyldap, aýyldyq okrýgter ákimdikteriniń balansyna berildi. Jergilikti atqarýshy organdardyń málimetinshe, 2024 jyly kenishterdiń qorǵanys qorshaýlaryn qalpyna keltirý, radıatsııalyq qaýipsizdik belgilerin ornatý, plıtalar men temir tabaqshalar tóseý jáne ınertti materıaldarmen jabý jumystaryn aıaqtady, — delingen mınıstrlik jaýabynda.
Sondaı-aq vedomstvonyń málimetinshe, 2024 jyly ekologııa departamentiniń synaq zerthanasy mamandary Aıyrtaý jáne Ǵ. Músirepov aýdandaryna bardy.
Olar ýran ken oryndarynyń sanıtarlyq-qorǵaý aımaǵynyń shekarasynda jáne jaqyn mańdaǵy eldi mekender aýmaǵynda gamma-sáýlelený dozasynyń ekvıvalenttik qýatyn ólshedi.
Nátıjesinde gamma-sáýlelený dozasynyń ruqsat etilgen mólsherden aspaǵany anyqtaldy.
Buǵan deıin Petropavldaǵy kárizdik aǵyn sýdy tazartý júıesin jańǵyrtý jobasy 20 jyldan beri aıaqtalmaı jatqanyn jazǵan edik.