SQO-daǵy Ozernoe aýyly dárigersiz otyr: turǵyndar mamanǵa kóriný úshin 70 km qatynaýǵa májbúr
PETROPAVL. KAZINFORM — Soltústik Qazaqstan oblysy Taıynsha aýdanyndaǵy Ozernoe aýylynyń turǵyndary medıtsınalyq qyzmetkerdiń joqtyǵyna shaǵymdanyp otyr. Olardyń aıtýynsha, dárigerge qaralý úshin aýdan ortalyǵyna deıin shamamen 70 shaqyrym jol júrýge týra keledi.
Ozernoe aýylynda, aýyl ákiminiń esebinshe, qazir 104 úı bar, 263 adam turyp jatyr. Turǵyndardyń basym bóligi — negizinen egde jastaǵy adamdar. Basy aýyryp, baltyry syzdasa baryp, kómek alatyn eldi mekende medıtsınalyq qyzmetker joq.
— Qart adam bolǵandyqtan jıi aýyramyz. 70 shaqyrym jerdegi emhanaǵa barý úshin kólik tabýyń kerek. Bizdiń kóligimiz bar, biraq jubaıym qartaıǵandyqtan ony júrgize almaıdy. Jasy seksennen asty. Sondyqtan aýdan ortalyǵyna jetkenshe adam shydamaı ólip ketýi de múmkin. Al barǵan kúnniń ózinde em-dom jazyp berse, úıde dári salatyn adam joq, — deıdi Leontına Korchınskaıa.
Aýyldyq eldi mekenderde: 50 adamnan 500 adamǵa deıin medıtsınalyq pýnktter; 500 adamnan 1500 adamǵa deıin feldsherli-akýsherlik pýnktter; 1500 adamnan bastap dárigerlik ambýlatorııa bolýy qajet.
Máselege qatysty SQO Densaýlyq saqtaý basqarmasy túsinikteme berdi.
Vedomstvonyń málimetinshe, turaqty medıtsına qyzmetkeri joq aýyldarda turǵyndarǵa medıtsınalyq kómek jaqyn ornalasqan alǵashqy medıtsınalyq-sanıtarııalyq kómek uıymdary arqyly kórsetiledi. Dárigerler men orta býyn medıtsına qyzmetkerleri kóshpeli qabyldaý júrgizedi, qajet bolǵan jaǵdaıda naýqastardyń úılerine barady. Al shuǵyl jaǵdaılarda jedel járdem turǵynnyń tirkelgen jerine qaramastan qyzmet kórsetedi.
Degenmen bul túsindirme turǵyndardyń kúndelikti máselesin tolyq sheshpeıdi. Sebebi josparly tekserýler, dıspanserlik baqylaý, anyqtamalar alý nemese qarapaıym konsýltatsııa úshin turǵyndar aýdan ortalyǵyna qatynaýǵa májbúr.
— Aýyldyq eldi mekende turaqty medıtsına qyzmetkeriniń bolmaýy medıtsınalyq kómektiń kórsetilmeıtinin bildirmeıdi. Ozernoe eldi mekeniniń turǵyndary 30 km jerdegi Kellerovkadaǵy dárigerlik ambýlatorııaǵa bekitilgen. Sondaı-aq olarǵa qyzmet kórsetetin jalpy tájirıbe dárigeri bar.
Densaýlyqqa nemese ómirge qaýip tóngen jaǵdaıda turǵyndar 103 nemese 112 nómirine habarlasýy tıis. Jedel járdem brıgadasy kelgenge deıin dıspetcher telefon arqyly alǵashqy kómek kórsetý boıynsha nusqaýlyq beredi. Qajet bolǵan jaǵdaıda naýqasqa shuǵyl medıtsınalyq kómek kórsetilip, jaqyn mańdaǵy statsıonarǵa jetkiziledi. Mundaı kómek patsıenttiń tirkelgen jerine nemese eldi mekende medıtsına qyzmetkeriniń bolýyna qaramastan kórsetiledi, — deıdi SQO Densaýlyq saqtaý basqarmasy basshysynyń orynbasary Nursultan Sarjanov.
Basqarma mamandary aýyldarǵa maman tartýdaǵy basty kedergilerdiń biri kadr tapshylyǵy ekenin jasyrmaıdy. Óńirde jalpy tájirıbelik dárigerler, pedıatrlar, akýsher-gınekologtar, anestezıolog-reanımatologtar sekildi mamandar jetispeıdi. Jas dárigerlerdiń basym bóligi kásibı múmkindigi mol ári áleýmettik jaǵdaıy jaqsy qalalardy tańdaıdy.
Máseleni turǵyn úı máselesi de ýshyqtyryp otyr. Vedomstvonyń málimetinshe, kóptegen shaǵyn aýylda qyzmettik baspana joq nemese kúrdeli jóndeýdi qajet etedi. Sondyqtan memleket tarapynan qyzmettik turǵyn úı, jeńildetilgen turǵyn úı kredıtteri, kóterme járdemaqy jáne aýylǵa barǵan tapshy mamandyq ıelerine 100 eń tómengi jalaqy mólsherinde birjolǵy tólem qarastyrylǵan.
— Budan bólek, oblystyń demografııalyq erekshelikteri de máseleni qıyndatady. Kóptegen aýylda halyq sany azaıyp, jastar qalaǵa kóship jatyr. Sonyń saldarynan bir medıtsına qyzmetkeri birneshe aýylǵa qatar qyzmet kórsetýge májbúr. Bul jol júrý ýaqytyn uzartyp, medıtsınalyq kómektiń qoljetimdiligine áser etedi. Sonymen qatar shalǵaı ornalasqan eldi mekenderge baratyn joldardyń sapasy men kólik qatynasy da qosymsha qıyndyq týǵyzady, — deıdi Nursultan Sarjanov.
Vedomstvonyń málimetinshe, bıyl óńirge 85 jas maman keledi dep josparlanǵan. Onyń 55-i memlekettik bilim berý tapsyrysy boıynsha, taǵy 30-y oblys ákimdiginiń granty arqyly daıarlanǵan mamandar. Olar oqýyn aıaqtap kelgennen keıin ǵana medıtsınalyq uıymdarǵa bólinedi.
Sonymen birge Densaýlyq saqtaý basqarmasy barlyq aýyldardy turaqty medıtsına qyzmetkerlerimen tolyq qamtamasyz etýdiń naqty merzimi joq ekenin moıyndaıdy. Mamandardyń aıtýynsha, bul máseleniń sheshimi jańa kadrlardy daıarlaýǵa, olardy aýylda turaqtandyrýǵa, turǵyn úı salýǵa jáne ınfraqurylymdy damytýǵa baılanysty. Sondyqtan aldaǵy jyldary shaǵyn jáne shalǵaı aýyldardyń bir bóliginde kóshpeli medıtsınalyq qyzmet kórsetý saqtalady.
Buǵan deıin SQO-da qazirgi ýaqytta turǵyndarǵa on kóshpeli medıtsınalyq keshen qyzmet kórsetip júrgenin jazǵan edik.
