SQO-daǵy mektepter 100 paıyz beınebaqylaý júıesimen jabdyqtaldy

PETROPAVL. KAZINFORM — Soltústik Qazaqstan oblysynda 444 mektep bolsa, sonyń barlyǵynda qaýipsizdik sharalary qolǵa alynǵan.

SQO bilim basqarmasy basshysynyń orynbasary Dınara Anafınanyń aıtýynsha, óńir mektepterine 11 myńǵa jýyq beınebaqylaý kamerasy ornatylǵan. Onyń 4 myńǵa jýyǵy mektep ishindegi jaǵdaıdy baqylaıdy.

— Eskertý júıesi 352 mektepte bar. Onyń ishinde barlyq terrorıstik turǵydan osal 284 nysan da qamtylǵan. Dabyl túımeleri 349 mektepte bar. Jedel basqarý ortalyǵyna 270 bilim berý uıymy qosylǵan, onyń ishinde terrorıstik turǵydan osal nysandardyń 82% qamtyldy. 99 mektepte mamandandyrylǵan kúzet bar, — deıdi Dınara Anafına.

Mamannyń aıtýynsha, 2025 jyldan bastap oblystyń mektepteri men kolledjderinde otbasy, áıel men bala quqyqtaryn qorǵaý máseleleri boıynsha «111» biryńǵaı respýblıkalyq baılanys ortalyǵyna jedel júginý úshin QR-kodtar engizildi.

— Óńirde psıhologııalyq qoldaý ortalyǵy ashyldy. Ortalyqtyń maqsaty — balalardyń, ata-analar men muǵalimderdiń psıhologııalyq jaǵdaıyn nyǵaıtýǵa jáne máselelerin sheshýge baǵyttalǵan psıhologııalyq qyzmettiń biryńǵaı júıesin qurý. Ortalyqta táýlik boıy «senim telefony» arqyly tegin anonımdi psıhologııalyq kómek kórsetiledi. Oǵan 8 800 080 8150 nómiri boıynsha habarlasýǵa bolady. Ortalyq 402 adamǵa, 93 ata-anaǵa, 241 oqýshyǵa jáne 68 pedagogqa ádistemelik jáne konsýltatsııalyq kómek kórsetti, — deıdi Dınara Anafına.

Esterińizge salaıyq, Petropavl mektepterine jasandy ıntellekt júıesi bar beınekameralar qoıylyp jatqanyn jazǵan edik.