SQO-daǵy mektep mýzeıinde saqtalǵan eki ǵasyrlyq shoıyn sandyq kimge tıesili
PETROPAVL. KAZINFORM – Soltústik Qazaqstan oblysy Konstantınovka aýylyndaǵy mektep mýzeıi sırek kezdesetin kóne shoıyn sandyqpen tolyqty.
Sandyqtyń bıiktigi 40 sm, uzyndyǵy – 68, eni 44 sm. Buıymnyń qaqpaǵynyń ishki betinde saqtalǵan zaýyttyq tańba erekshe qyzyǵýshylyq týdyrady. Tańbada «KATAV» degen jazý bar. ıAǵnı, bul buıym Reseıdiń Ońtústik Oral óńirindegi Katav-Ivanov metallýrgııalyq zaýyttarynyń birinde jasalýy múmkin. Tarıhı derekterge sáıkes, kásiporyn XVIII ǵasyrdyń ortasynda qurylǵan.
Jádigerdi osy mekteptiń burynǵy dırektory, qazir zeınet demalysyndaǵy Vasılıı Mantarıdı jergilikti kásipkerlerdiń birinde kórip, qalap surap alǵan eken.
- Bizdiń mekteptiń túlegi, Gýsakovka eldi mekeniniń turǵyny Mıhaıl Markgraftan bul buıymdy eki-úsh ret surap bardym. Nátıjesinde mýzeıimizge syılady. Durys ataýy – seıf-qazyna. Munyń ishine aqsha, qujattar sııaqty qundy zattardy salyp saqtaǵan, - deıdi Vasılıı Mantarıdı.
Salmaǵy shamamen 3 tsenterge jetetin sandyqtyń qarapaıym adamǵa tıesili bolmaǵany anyq. Ańyz boıynsha, ol belgili ǵalym, aǵartýshy Shoqannyń týǵan atasy Ýálıge qatysty bolýy múmkin.
- Biraq qolymyzda ony rastaıtyn qujaty joq. Revolıýtsııadan keıin bul zat onyń baqtashylarynyń biriniń qolyna túsken. Kóp jyldar boıy Şýchınskide saqtalyp keldi. Qoldan qolǵa ótip, endi bizdiń mýzeıden oryn aldy.
Qyzyqtap kelip, suraýshylar kóp. Biraq bul qundy jádigerdi eshkimge bermeımiz, - deıdi Vasılıı Mantarıdı.
Konstantınovkadaǵy mektep mýzeıi 2019 jyly mektep dırektorynyń bastamasymen ashyldy. Qazir ol Aıyrtaý aýdany boıynsha mektepterdegi jalǵyz murajaı. Osy aralyqta jádigerler sany myńnan asqan.
- Qundy jádigerler óte kóp. Mysaly, qarýdyń qola, temir ushtary saqtalǵan. Mamonttyń súıekteri bar. Munyń bári ózimizde tabylǵan. Turǵyndar ákelip tapsyrady. Konstantınovka aýylynyń tarıhyna qatysty jádigerler de kóp, - deıdi Vasılıı Mantarıdı.
Buǵan deıin Samarqandtaǵy kórmede Ámir Temirdiń syıǵa tartqan týy men tarıhı jádigerleri qoıylǵanyn jazǵan edik.
