SQO-daǵy «Qulager» komandasynyń bastyǵyna qatysty tergeý júrip jatyr

PETROPAVL. KAZINFORM — Soltústik Qazaqstan oblysyndaǵy hokkeı klýbynda shý shyqty.

«Qulager» hokkeı klýbynyń basshysy Sergeı Fıl habar-osharsyz ketip, birneshe hokkeıshi oǵan alaıaqtyq faktisi boıynsha polıtsııaǵa shaǵymdandy. Kúdikti «syıaqyǵa» qazaqstandyq qujatty jasap berýge ýáde etken eken. 

«Qulager» hokkeı klýbynyń dırektory Igor Sherstovtyń aıtýynsha, Sergeı Fıl jarystarǵa shyǵýmen, muz aıdynynda jattyǵýlardy uıymdastyrýmen aınalysqan.

— Ótken jyldyń jeltoqsan aıynda Sergeı Fıl «Qulager» hokkeı klýbyna jumysqa alyndy. 24 qyrkúıekten bastap jumysqa shyqpaı qoıdy. Ony izdeý barysynda alaıaqtyq faktileri anyqtaldy. Ol týraly aıta almaımyn, polıtsııaǵa aryz jazyldy, tergeý barysynda bári anyqtalatyn bolady. Men aqsha berip nemese alyp jatqanyn kórgen joqpyn, sol sebepti beıhabarmyn. Qazir onyń burynǵy krımınaldyq ómiri jaryqqa shyǵyp jatyr, bul adam bizge resmı túrde jumysqa turdy, eńbekaqysynan barlyq mindetti tólemder alynyp otyrdy. Eger de quqyq qorǵaý organdary tarapynan suraq bolsa, bári anyqtalar edi. Hokkeı federatsııasynyń, klýbtyń resmı saıttarynda ol týraly aqparat, fotosy ashyq turdy, — deıdi Igor Sherstov.

Petropavl qalalyq polıtsııa basqarmasynyń málimetinshe, hokkeı klýbynyń bastyǵy eki jáne odan da kóp adamǵa alaıaqtyq jasaý boıynsha kúdikti.

— Petropavl qalalyq polıtsııasyna «Qulager» komandasynyń hokkeıshileri aryzdandy. Bul fakti boıynsha Astana qalasynyń 45 jastaǵy turǵynyna qatysty sotqa deıingi tergeý bastaldy. Qazirgi ýaqytta onyń júrgen jerin anyqtaý jáne ustaý boıynsha jedel-tergeý jumystary júrgizilip jatyr, — deıdi Petropavl qalalyq polıtsııa basqarmasy tergeý bóliminiń bastyǵy Azamat Bekturǵanov.

Polıtsııa qyzmetkeriniń aıtýynsha, qalǵan aqparat QR Qylmystyq-protsestik kodekstiń 201-babyna sáıkes jarııa etilmeıdi.

Buǵan deıin SQO-da shetel azamattaryna zańsyz JSN berý derekteri anyqtalǵanyn jazǵan edik.