SQO-daǵy kolonııalardyń birinde jazasyn óteýshiler ózin jaraqattady

PETROPAVL. KAZINFORM — Soltústik Qazaqstan oblysy boıynsha Qylmystyq-atqarý júıesiniń № 51 mekemesinde sottalǵandar kóterilip, ózderine jaraqat saldy.

— 14 mamyr kúni tańerteń bizdiń ata-analar chatyna «6 otrıadta ne bolǵanyn estidińder me?» dep jazdy. Oqıǵanyń naqty qashan bolǵany belgisiz. Túnde otrıadqa qyzmetkerler júgirip kirip, uıyqtap jatqan olardy urǵan, mazaq etken. Jazasyn ótep jatqan balalar ózderin jaraqattaǵan. Qansyrap jatqan bireýine eshkimdi, ózderiniń medqyzmetkerlerin de jaqyndatpaǵan. Qalaı ekenin bilmeımin, bireýi jedel járdem qyzmetin shaqyryp, olardy 3 saǵat boıy kirgizbeı syrtta ustaǵan deıdi. Bizdiń estýimizshe, 15 adam ózin jaraqattaǵan. Birnesheýiniń famılııasyn da bilemiz, — deıdi balasynyń jaǵdaıyna alańdaǵan ana.

Ata-analardyń aıtýynsha, qazir bir jazasyn óteýshi Petropavldaǵy emdeý mekemesiniń birinde, reanımatsııada jatyr. Oǵan ota jasaldy. 

— Anasy búgin aýrýhanaǵa barady. Ol oqıǵanyń bolǵanyn rastap otyr. Al bizge bári tynysh, eshteńe bolǵan joq dep aıtady. Búgin túnde olardy baraktan bir jaqqa tósek-ornymen shyǵardy dep estidik. Balamyzdyń jaǵdaıyn bile almaı otyrmyz. Qansha jasyrǵanymen shet jaǵasyn estip jatyrmyz ǵoı, — deıdi jazasyn óteýshilerdiń biriniń anasy.

Áıeldiń aıtýynsha, bir aı buryn osy túzetý mekemesinde jazasyn óteýshiler qazirgi jaǵdaıǵa narazylyqtaryn bildirip, kóterilgen. Biraq ol joly jergilikti deńgeıde másele sheshilgen.
Qylmystyq-atqarý júıesi komıteti osy derekke qatysty jaýap berdi.

— SQO № 51 mekemesinde úsh sottalýshydan tyıym salynǵan zattar tárkilendi. Mekeme rejımimen kelispegen sottalǵandar ózderine dene jaraqatyn saldy. Barlyǵyna medıtsınalyq kómek kórsetildi. Olardyń biri bógde zatty jutyp qoıýyna baılanysty qalalyq aýrýhanaǵa jetkizilip, operatsııa jasaldy. Medıtsına qyzmetkerleriniń aıtýynsha, densaýlyq jaǵdaıy qanaǵattanarlyq, — delingen resmı jaýapta.

Buǵan deıin SQO-da 9 mamyr qarsańynda jaraqattanyp, aýrýhanaǵa túsken maıdanger qaıtys bolǵanyn jazǵan edik.