SQO-daǵy qoǵamdyq shtabtar 10 myńnan astam adamǵa keńes berdi
PETROPAVL. KAZINFORM – Soltústik Qazaqstan oblysynda sý tasqynynan zardap shekkenderge kommýnıkatsııalyq jáne aqparattyq-túsindirý jumystaryn júrgizetin qoǵamdyq shtabtar jumys istep jatyr. Qurylǵaly beri shtab músheleri on myńnan astam adamǵa keńes berdi.
Qoǵamdyq shtab Petropavlda jáne tasqynnan zardap shekken Ǵ. Músirepov, Taıynsha, Esil, Qyzyljar, Shal aqyn aýdandarynda quryldy. Oblys boıynsha onyń quramyna 159 adam kirgen. Negizinen shtabqa úkimettik emes uıymdardyń belsendileri, jastar, kásipkerler, blogerler, máslıhat depýtattary, partııa ókilderi, dinı qyzmetkerler, zań jáne qarjy salasyndaǵy sarapshylar múshe.
Qoǵamdyq shtab músheleri zardap shekkenderge ótemaqy alý tetigin túsindirý úshin bastapqyda evakýatsııa pýnktterinde kún saıyn túsindirý jumystaryn júrgizdi. Qazir úıleri sýda qalǵan turǵyndarmen ýaqytsha turý oryndaryna baryp kezdesip jatyr.
Bolat Qojahmetov «Qazaqstan halyq partııasy» oblystyq fılıaly tóraǵasynyń orynbasary. Sondaı-aq Petropavl qalalyq máslıhatynyń depýtaty. Ol Petropavl kásibı-pedagogıkalyq joǵary kolledjiniń jataqhanasyna bekitilgen. Bul jerde de tasqynnan zardap shekkender ýaqytsha turyp jatyr.
«Bul ýaqytsha turý pýnktinde Kosogor, Oıqala, Hromzaýyt shaǵygn aýdandarynyń, Zarechnyı kentiniń jáne Olshanka men Bolshaıa malyshka eldimekenderiniń turyp jatyr. Arasynda múmkindigi shekteýli jandar da, balalar da bar. Stýdentter jataqhanasy sektsııaly, árqaısysynda eki bólmeden, jýynatyn jáne dárethanalary bólek, yńǵaıly. Qazir turǵyndar úsh mezgil ystyq tamaqpen tegin qamtylǵan, kolledj ashanasynan tamaqtanady. Birinshi qabatta gýmanıtarlyq kómekti taratatyn ortalyq ta bar. Al bizdiń negizgi mindetimiz, halyqpen kezdesip, jaǵdaılaryn bilý, birjolǵy ótemaqy alýyna kómektesý. Sondaı-aq shyǵyndaryn óteýge qatysty qujattaryn jınaýǵa, bankte nesıeleri bolsa, merzimin keıinge shegerýge járdemdesý», - deıdi Bolat Qojahmetov.
Qoǵamdyq shtab músheleri úılestirý qyzmetin de atqaryp jatyr.
«Ótinishpen kelgen turǵynnyń máselesin ózimiz sheshe almasaq, qalalyq ákimdikke habarlasamyz. Osylaısha zardap shekkenderge kómekke notarıýstar, zańgerler jáne halyqqa qyzmet kórsetý ortalyǵynyń mamandary keldi. Nátıjesinde zardap shekkenderdiń basym bóligi eki kúnniń ishinde birjolǵy tólemdi aldy», - Bolat Qojahmetov.
Depýtattyń aıtýynsha, zardap shekkenderdiń máseleleri kóp. Máselen, biriniń úıiniń qujaty tolyq emes. Endi biriniń atynda eki úı bolǵanymen bireýinde ózi, ekinshisinde balasy turǵan.
«Sýǵa ketken úılerdi jalǵa alyp turǵandar da bar. Olar baspana ıesimen zańdy túrde kelisimge otyrmaǵan. Sýǵa ketken múlkimizdi endi qalaı qaıtaramyz dep suraıdy. Al, Zarechnyı kentindegi kópqabatty úılerdiń birinshi qabaty sýǵa ketti. 2-3 qabat turǵyndaryna buǵan deıin 100 AEK mólsherinde birjolǵy tólem berilmeıdi degen, endi mundaı kómekti bári alatyn boldy», - deıdi qoǵamdyq shtab múshesi.
Jalpy, oblystaǵy qoǵamdyq shtab músheleri gýmanıtarlyq kómek jınaý pýnktteriniń jumysyn da úılestirip, jetkizilgen kómekti suryptaý boıynsha ótinimderdi, jınaqtaýdy, esepke alýdy uıymdastyrady, sondaı-aq evakýatsııalanǵandardyń ornalasqan jerlerine qajetti kómekti jetkizý boıynsha jumystarǵa kómektesip jatyr.
Buǵan deıin SQO-da sýdan zardap shekkenderge arnalyp «Solnechnyı-2» kentinde alǵashqy úılerdiń qurylysy bastalǵanyn aıtqan edi.
