SQO-daǵy Kóbensaı aýylynda taza sý máselesi bar ma
PETROPAVL. KAZINFORM – Soltústik Qazaqstan oblysy Ýálıhanov aýdanyndaǵy Kóbensaı aýylyna taza sý berý qondyrǵysy ornatylǵanymen, turǵyndardyń qýanyshy uzaqqa barmaǵan.
Aýyl turǵyndary máseleni kóterip, áleýmettik jelide jarııalady. Beınejazba avtorynyń aıtýynsha, aýyldy sýmen qamtamasyz etýi tıis sý berý qondyrǵysynyń aınalasyn aram shóp basqan. Strategııalyq mańyzy bar nysan ashyq-tesik jatyr, esigine qulyp salynbaıdy, aǵash tireýish qana tur.
- Iesiz qalǵan, eshkim qaramaıdy, sý sorǵysynan sý dalaǵa aǵyp jatyr. Sosyn qaıdan qysym bolady, - deıdi Kóbensaı aýylynyń turǵyny.
Kóbensaı eldi mekeni qaraıtyn Teljan aýyldyq okrýginiń ákimi Sánııa Ótegenovanyń aıtýynsha, bul nysan 2023 jyly paıdalanýǵa berilgen.
- Eldi mekende 86 úı bar jáne 322 adam turyp jatyr. Qazir aýylda sý bar, - deıdi Sánııa Ótegenova.
Bul máselege qatysty Ýálıhanov aýdandyq turǵyn úı-kommýnaldyq sharýashylyǵy bólimi jaýap berdi. Mamandardyń aıtýynsha, aýyldy sýmen jabdyqtaý jobasyna 296 mln teńge jumsalǵan.
- 2023 jyldyń jeltoqsan aıynda nysan Ýálıhanov aýdany ákimdiginiń sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń menshigine berildi. Qazirgi ýaqytta nysan qorshalyp, kúzetke alynǵan. Sondaı-aq aýmaqty abattandyrý jumystary júrgizilip, aınalasyndaǵy shóp shabylyp, qoqystan tazartylyp jatyr. Nysandy «Qyzyltý Sý Arnasy» JShS-niń senimgerlik basqarýyna berý rásimi bastaldy, - dep jaýap berdi tilshi saýalyna ákimdik ókilderi.
Jaýapty mekemeniń málimetinshe, qazirgi ýaqytta Kóbensaı aýylynda aýyz sýǵa qatysty másele joq. Dálel retinde arnaıy beınejazba da jasaǵan eken.
Buǵan deıin barlyq kásiporyn sý únemdeýdiń bes jyldyq josparyn ázirleýge mindettelgenin jazǵan edik.
