SQO-daǵy qyryq gradýs aıazda qatpaıtyn erekshe kól óńirdiń sakraldy kartasyna engizildi

PETROPAVL. KAZINFORM – Soltústik Qazaqstan oblysyndaǵy Teke kóli óńirdiń sakraldy kartasyna engizildi.

Bul týraly SQO tarıhı-mádenı murany qorǵaý jáne paıdalaný ortalyǵy málim etti.

Teke kóli Ýálıhanov aýdanynyń ortalyǵy Kishkenekól aýylynyń soltústik-shyǵysyna qaraı 40 km jerde ornalasqan. Alyp jatqan aýmaǵy Petropavldan úlken, uzyndyǵy – 33, eni 20 km shamasynda. Eń tereń jeri nebári 1 metr. Ereksheligi – bir lıtr sýda 300 grammǵa deıin tuz bar. ıAǵnı sýy kópke tanymal Óli teńiz sýynyń quramymen birdeı. Sondyqtan qandaı aıaz bolmasyn, bul kól qatqan emes.

Kóldi shaıan tárizdes jándik – artemııa salına mekendeıdi. Mamandardyń aıtýynsha, ol tek ekologııalyq taza, tuzy joǵary kólderde kezdesedi. Mundaı kólder tek Qazaqstanda, Reseıde jáne AQSh-ta ǵana bar.

Qazaqtar úshin bul sý qoımasynyń orny bólek, ol ejelden qasıetti oryn bolyp sanalady jáne ańyzdarmen kómkerilgen.

Jergilikti turǵyndardyń aıtýynsha, batyrlar munda jaralaryn emdik balshyqpen emdeýge kelgen.

Taǵy bir ańyzdarda Teke kóliniń buryn teńiz bolǵandyǵy aıtylady. Mańynda aqqaıyńdardyń ný ormany bolǵan eken. Qaýlap ósken aǵashtan jalǵyz qalǵan aqqaıyńdy kórgen aýyl turǵyndary bar. Kıeli aǵash 1986 jyly ósýin toqtatty.

Teke kóliniń sýy qasıetti dep sanalady, jazda óńir turǵyndary, reseılikter emdelýge keledi.