SQO-daǵy eń iri salyq tóleýshiler kimder

PETROPAVL. KAZINFORM – Soltústik Qazaqstan oblysynda bıylǵy jarty jylda salyq jáne basqa mindetti túsimder esebinen memlekettik bıýdjetke 91,8 mlrd teńge túsken. Bul ótken jylǵy kórsetkishten bir mlrd teńgege artyq. 

SQO memlekettik kirister departamentiniń málimetinshe, qarajattyń 30 mlrd teńgege jýyǵy respýblıkalyq qazynaǵa ketse, qalǵany jergilikti bıýdjetke túsken. Jergilikti bıýdjetke túsimder ósken, ol 6,1 mlrd teńgege nemese 10,9%-ǵa artqan. 

SQO-da respýblıkalyq monıtorıngide turǵan eki iri salyq tóleýshi bar. Olar Qazaqstannyń iri salyq tóleýshileriniń 300-digine kiredi. Sonyń biri – Ońtústik Oral temir jolynyń Petropavl bólimshesi – «Reseı temir joldary» AAQ fılıaly. Ekinshisi – «SevKazEnergo» AQ.

Oblystyń osy eki iri kásiporynynan bıýdjetke 5,7 mlrd teńge túsedi. Bul barlyq túsim úlesiniń 6,1%-yna teń. Sonyń ishinde, Ońtústik Oral temir jolynyń Petropavl bólimshesinen ótken jarty jylda 3,4 mlrd teńge, «SevKazEnergo» AQ – 2,3 mlrd teńge túsken.

QR Ulttyq statıstıka bıýrosynyń málimetine súıensek, 2023 jylǵy aqparat boıynsha SQO-da 11 431 zańdy tulǵa tirkelgen. Onyń ishinde shaǵyn bıznestiń úlesi joǵary – 11 173. Orta bıznes sýbektileriniń sany 200 bolsa, óńirde 58 iri kásiporyn tirkelgen. Alaıda barlyq tirkelgen zańdy tulǵanyń tek 9 655-i ǵana jumys istep jatyr. Eki myńǵa jýyq shaǵyn bıznes tek qaǵaz júzinde ǵana tur. 

Buǵan deıin SQO-da zeınetaqy jınaǵynyń shekti somadan asqan bóligin turǵyndar negizinen baspana alýǵa jumsaǵanyn jazǵan edik.