SQO-daǵy elevatorlar jańa erejelerge qarsy: bıznes kóleńkeli naryqqa ketýi múmkin
PETROPAVL. KAZINFORM — Soltústik Qazaqstan oblysyndaǵy elevator ıeleri Qazaqstan Respýblıkasy Básekelestikti qorǵaý jáne damytý agenttiginiń jańa bastamalaryna qarsylyq bildirdi.
Kásipkerlerdiń pikirinshe, usynylǵan túzetýler zańdy jumys istep otyrǵan kásiporyndardy kóleńkeli sektorǵa ıtermeleýi múmkin. Másele SQO Kásipkerler palatasy janyndaǵy agroónerkásiptik keshen keńesinde talqylandy.
SQO Kásipkerler palatasy baspasóz qyzmetiniń málimetinshe, agenttik ázirlegen qujatqa sáıkes, elevatorlarǵa «negizgi qýat» mártebesi berilip, olardyń jumysyna jańa talaptar qoıylmaq. Bul jobany qazir «Atameken» UKP saraptamadan ótkizip jatyr.
Astyq qabyldaý kásiporyndary ókilderi jańa normalar jumysty báseńdetip, básekelestikke kedergi keltiredi dep sanaıdy. Olar bul máselege qatysty QR Básekelestikti qorǵaý jáne damytý agenttigine, Aýyl sharýashylyǵy mınıstrligine jáne «Atamekenge» ujymdyq hat joldaǵan.
Kásipkerler aldymen elevatorlarǵa «negizgi qýat» mártebesin berý krıterııleri túsiniksiz ekenin aıtady. Sheshimderdi salany bilmeıtin mamandar qabyldasa, júıe daǵdarysqa ushyraýy múmkin.
— Qazir óńirde 45 lıtsenzııalanǵan elevatormen qatar, kóptegen tirkelmegen kásiporyn jumys isteıdi. Zańdy jumys istep jatqan bıznes qysymǵa alynyp otyr, al kóleńkeli naryq eshqandaı talapsyz jumys isteıdi, — deıdi «Severnoe zerno» kompanııasynyń negizin qalaýshy, Qazaqstannyń Astyq odaǵynyń ókili Evgenıı Karabanov.
Budan bólek kásipkerler qosymsha shyǵyndardan qaýiptenedi. Agenttiktiń elevatorlarǵa ótinimderdi qabyldaý úshin jeke ınternet-resýrs qurý talaby jańa qyzmetkerler alýdy qajet etedi, saldarynan fermerlerge qosymsha salmaq túsedi.
— Elevatorlardyń ózi búgin paıda ákelmeı otyr. Mundaı jaǵdaıda kerisinshe qoldaý qajet, — dedi Evgenıı Karabanov.
Oblystyq aýyl sharýashylyǵy basqarmasynyń ókili Rýstam Valeev SQO-da usaq sharýashylyqtardyń elevatorlarǵa astyq ótkize almaý jaǵdaılary tirkelmegenin aıtty. Onyń sózinshe, Qoldau.kz júıesinde elevatorlar týraly barlyq aqparat bar.
Sonymen qatar, kásipkerler agenttik usynyp otyrǵan ótinimderdi qaraý merzimin 30 jumys kúni dep belgileý durys emes dep sanaıdy. Ásirese oraq naýqanynda ony josparlaý múmkin emes.
Kásipkerler palatasynyń ókilderi de talaptardy qatańdatý lıtsenzııalanǵan elevatorlarda saqtalatyn astyq kólemin azaıtyp, «kóleńkege» áketýi múmkin ekenin aıtady.
— Bizdegi saqtaýdaǵy 30 mln tonna daqyldardyń tek jartysyn ǵana lıtsenzııalanǵan elevatorlar qamtamasyz etip otyr. Eger jańa talaptar qabyldansa, olardyń úlesi odan ári azaıýy yqtımal, — deıdi SQO Kásipkerler palatasy dırektorynyń orynbasary Baýyrjan Ahmetaev.
Mamandardyń aıtýynsha, qazirgi ýaqytta Qoldau.kz platformasy bar, tek oǵan qajetti fýnktsııalardy qosyp jetildirý qajet.
Ázirge QR Básekelestikti qorǵaý jáne damytý agenttiginiń buıryq jobasy jarııalanǵan joq «Atameken» UKP bıznes ókilderiniń usynystaryn eskerip, saraptamalyq qorytyndy daıyndamaq.
Buǵan deıin óńirlerde oraq naýqany bastalǵanyn jazǵan edik.