SQO-daǵy eldi mekenge brýtsellezge baılanysty shekteý engizildi

PETROPAVL. KAZINFORM — Soltústik Qazaqstan oblysy Birlik aýylynda qara maldan brýtsellez anyqtaldy. 

SQO veterınarııa basqarmasynyń málimetinshe, aýylda 58 qara maldan aýrý anyqtalǵan. Barlyq juqtyrǵan mal soıyldy. Qazir eldi mekenge shekteý sharalary engizilgen.

— Shekteý sharalary zerthanalyq nátıjeler qatarynan eki ret teris kórsetkende ǵana jáne aýrý mal turǵan qoralar tolyq dezınfektsııadan ótkende ǵana alynyp tastalady. Oǵan deıin iri qara maldy jáne onyń ónimderin satýǵa bolmaıdy. Tek aýrý maldy ǵana soıýǵa ruqsat beriledi, — deıdi veterınarlar.

Mamandardyń aıtýynsha, ınfektsııanyń taralýyna veterınarlyq talaptardyń oryndalmaýy, ıaǵnı túlikti veterınarlyq qyzmetti eskertpeı, qujattarynsyz ákelý sebep bolýy múmkin.

Qazir oshaq ornynda respýblıkalyq epızootııaǵa qarsy otrıad jumys istep, aýmaqty zararsyzdandyryp jatyr.

Jalpy bıyl SQO-nyń tórt aýdanynan brýtsellez tabylǵan. Aýyrǵan 68 iri qara maldyń 58-i — Esil aýdanyna, jeteýi — Qyzyljar aýdanyna, ekeýi — Aqjarǵa jáne bireýi Aıyrtaý aýdanyna tıesili.

Ótken jyldyń sáıkes kezeńinde óńirde 180 mal aýrý juqtyrǵan.

Buǵan deıin SQO-da Prıbrejnoe eldi mekenine kiretin jol jabylǵanyn jazǵan edik.