SQO-daǵy demografııalyq ahýal: týý kórsetkishinen ólim-jitim basym

PETROPAVL. KAZINFORM - Soltústik Qazaqstan oblysynda bıylǵy toǵyz aıdaǵy demografııalyq kórsetkish halyq sanynyń azaıǵanyn kórsetip otyr.

demografııa
Kollaj: Midjourney

Ulttyq statıstıka bıýrosynyń SQO boıynsha departamentiniń málimetinshe, 1 qazandaǵy jaǵdaı boıynsha óńirde 510,2 myń adam turyp jatyr. Qala men aýyldyq jerlerdegi turǵyndardyń úlesi teń.

Óńir týý kórsetkishi tómen oblystardyń qatarynda. Bıylǵy qańtar-qyrkúıek aılarynda SQO-da 3 202 náreste dúnıege kelgen. Onyń 52% ul bala, qalǵany qyzdar.

Aýdandar arasynda bala týýdan Aqjar, Ýálıhanov jáne Shal aqyn aýdandary alda keledi. Kerisinshe, M. Jumabaev, Aqqaıyń aýdany jáne Ǵ. Músirepov atyndaǵy aýdan kósh sońynda keledi.

Óńirdegi demografııalyq ahýalǵa áser etip otyrǵan negizgi máselelerdiń biri - ólim-jitim deńgeıiniń joǵarylyǵy. Bıylǵy toǵyz aıda oblysta 4 408 adam qaıtys bolǵan.

Ólimniń negizgi sebepteriniń arasynda qan aınalymy júıesi aýrýlary birinshi orynda tur. Olardyń úlesi - 19%. Júıke júıesi aýrýlarynan qaıtys bolǵandardyń úlesi 17% bolsa, tynys alý organdary aýrýlary 15% úshinshi orynda tur. Onkologııadan - 11%, as qorytý organdarynyń aýrýlarynan 9,5% adam qaıtys bolǵan.

Al jazataıym oqıǵalar, ýlaný jáne jaraqattaný saldarynan bolǵan ólim jaǵdaılarynyń úlesi - 6% bolsa, qalǵan 22% basqa sebepterge tıesili.

Otbasylyq-demografııalyq kórsetkishterge kelsek, 2026 jylǵy qańtar-qyrkúıek aılarynda oblysta 2 194 neke tirkelgen. Osy kezeńde 1 088 otbasynyń ajyrasqany belgili boldy.

Buǵan deıin Qazaqstanda 40 jastan asqan áıelderdiń bala týý kórsetkishi artqanyn jazǵan edik.