SQO-daǵy boran: 9 eldi meken 6 kúnnen beri jaryqsyz otyr
Soltústik Qazaqstan oblysynda borannyń saldarynan elektr jelileri úzilgen eldi mekenderdiń toǵyzy áli kúnge jaryqsyz otyr. Energetıkter bul aýyldarǵa búgin keshki saǵat 21.00-ge deıin elektr qýatyn qosýǵa ýáde etti, dep habarlaıdy Kazinform.
«Sevkazenergo» AQ baspasóz qyzmetiniń málimetinshe, qazirgi ýaqytta Aqqaıyń, M.Jumabaev jáne Esil aýdandarynda 803 turǵyny bar 9 eldi meken jaryqsyz otyr. Máseleni sheshý úshin oqıǵa ornynda kompanııanyń 41 brıgadasy, 55 arnaıy tehnıkasy jumys istep jatyr.
«M.Jumabaev aýdanyndaǵy joǵary voltty 110 kV «PJEO-2-Býlaev-munaı» tireýishin aýystyryp, jańasyn ornatý qıyndyq týdyryp jatyr. Esterińizge salaıyq, 18 qarasha kúni boran saldarynan birneshe metrlik metall dińgektiń basy qulaǵan edi. Aýdan tutynýshylaryn ýaqytsha basqa elektrmen qamtý jelilerine qostyq.
Eski metall tireýishti tolyq buzyp alyp, onyń ornyna temirbeton eki jańa tireýish qoıýǵa sheshim qabyldandy. Qazirgi ýaqytta brıgadalar synyp túsken digekti buzdy. Jańa temirbeton tireýishterdi ornatyp, olardy naızaǵaıdan qorǵaıtyn bolatarqandarmen bekitti», – delingen habarlamada.
Energetıkter aýa raıy múmkindik bergen jaǵdaıda eldi mekenderdi elektr jelilerine qosý jumystaryn búgin, saǵat 21.00-ge deıin aıaqtamaq.
Buǵan deıin borannyń saldarynan SQO-da 200-ge jýyq eldi mekenniń jaryqsyz qalǵanyn jazǵan edik. SQO Energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Vladıslav Lýkın qazirgi ýaqytta óńirde elektr jelileriniń 95% tozyǵy jetkenin habarlady.
