SQO-daǵy Bolshoı Izıým eldi mekeninde burshaq pen daýyl úılerdi zaqymdap, baǵandardy qulatty
PETROPAVL. KAZINFORM – Soltústik Qazaqstan oblysy Bolshoı Izıým eldi mekeninde aýa raıynyń saldarymen kúresip jatyr.
Taıynsha aýdanyndaǵy aýylda keshe saǵat 17.00 shamasynda daýyl turyp, jańbyr aralas iri burshaq jaýǵan.
Jergilikti turǵyndardyń aıtýynsha, tabıǵattyń bul qubylysy 2-3 mınýtqa ǵana sozylǵanymen, aıtarlyqtaı zııan keltirip úlgerdi. Keı turǵyndardyń shatyryn julyp áketken, endi biriniń qorshaýyn zaqymdaǵan. Kópshiliginiń baqshasyndaǵy óskinderi búlindi. Elektr jelileri úzilip, aýyl jaryqsyz qaldy.
Bolshoı Izıým aýyldyq okrýginiń ákimi Talǵat Júsipovtyń aıtýynsha, eldi mekende 8 úıge zaqym keldi, kópshiliginiń shatyry tesildi, keıbirinikin ushyryp áketken.
- Qazaqtelekomnyń úsh baǵanyn qulatty. Qazir mamandar jóndep jatyr. Elektr jelileri úzilgen edi, ony jóndep ketti, - deıdi Talǵat Júsipov.
«Qazgıdromet» RMK SQO fılıalynyń málimetinshe, erteń 14 maýsymda kúndiz oblystyń batysynda, soltústiginde qatty jańbyr kútiledi. Túnde oblystyń batysynda, soltústiginde, shyǵysynda naızaǵaı oınap, kúndiz óńirdiń batysynda, soltústiginde burshaq jaýmaq. Túnde jáne tańerteń oblystyń batysynda, soltústiginde tuman, kúndiz oblystyń batysynda, soltústiginde, ońtústiginde ekpini 15-20 m/s jel turmaq.
Petropavlda da naızaǵaı oınap, kúndiz burshaq jaýady degen boljam bar. Ońtústik-batystan, batystan jel soǵady, kúndiz ekpini 15-20 m/s jetpek.
Buǵan deıin Petropavlda jumysshy JEO-2 aýmaǵynda joǵarydan qulap ketkenin jazǵan edik.
