SQO-daǵy Beskól aýylynda 109 úı sý astynda qaldy
PETROPAVL. KAZINFORM – Soltústik Qazaqstan oblysy Beskól aýylynda turǵyndar arnaıy qyzmettermen birge sý tasqynymen kúresip jatyr. Arnasynan shyǵyp tasyǵan Esil ózeni jan-jaqtan qaýmalap, eldi mekenge kirip jatyr. Tańerteńnen beri 109 úı sý astynda qaldy.
Beskól aýyly turǵyndarynyń aıtýynsha, búgin túnimen uıqy bolmaı bógetterdi nyǵaıtqan. Alaıda tańǵy saǵat 7.30 shamasynda bóget Jambyl kóshesi jaǵynan qatty aǵyn sýǵa shydas bermeı buzylyp, sý aýylǵa lap bergen. Eki saǵattyń ishinde birneshe úı sýǵa ketti.
Qazir tasqyn sýmen kúreske tótenshe jaǵdaılar departamenti qyzmetkerleri, polıtsııa, jergilikti atqarýshy organ, áskerı qyzmetshiler jumyldyrylǵan. Beskól eldi mekeninde Qaraǵandy men Almatydan kómekke arnaıy kelgen mamandar jumys istep jatyr. Máselen bul jerde Qaraǵandy qalalyq №2 mamandandyrylǵan órt sóndirý bóliminen kelgen 40 adam tasqyn sýmen kúresýde.
Oksana Golovanova búgin ekinshi kún kórshilerimen birge jumys istep jatqan adamdardy tamaqtandyryp jatyr.
«Bul jerde 10-15 jaqty kórshi jınalyp, áskerı qyzmetshilerdi, kómekke kelgen volonterlerdi tamaqtandyryp jatyrmyz. Qansha adamdy qamtyǵanymyzdy aıta almaımyn. Óıtkeni kúni boıy kezek-kezekpen tamaqtandyryp jatyrmyz. Basqa adamdar da azyq-túlik – kartop, makaron, túrli jarmalar ákelip berip jatyr, ony osy jerde pisiremiz. Keıbiri daıyn tamaq ákelip qaldyryp jatyr. Men osy aýylda týǵanmyn. 40 jyldyń ishinde mundaı topan sýdy kórmeppin. Sý úıge mine kelip tur, biraq myna jigitter bar kúshin salyp jatyr. Basynda qoryqtym, jyladym, endi qazir eshqandaı sezim qalmady. Birliktiń arqasynda bul qıyndyqty da jeńip shyǵamyz. Bul kúnder de artta qalady», - deıdi Oksana Golovanova.
Kórshi kóshede de turǵyndar sýmen arpalysyp jatyr. Aıtýlarynsha, 2 saǵattyń ishinde sý deńgeıi 7 sm-ge kóterilgen. Biraq kópshiligi áli de áliptiń artyn baǵyp, kóshýge asyǵar emes. Múmkin bizdiń úıge jete qoımas degen úmit bar.
Beskól aýylynda qazir bótelkedegi sý qat taýarǵa aınalǵan. «Nıka» atalǵan myna dúkende nan saǵat 15.00 kezinde bitip qalǵan. Dúkenniń satýshysy Alena Gorodetskaıanyń aıtýynsha, tańǵy saǵat 9.00-de ádettegideı 40 bólke nan jetkizilgen, keı turǵyndar 5-6 bólkeden alǵan. Kesheden qalǵan tátti nandar da satylyp ketipti, sórede tek bir pıtstsa ǵana qalǵan. Kórshi «Kolos» dúkeninde de nan joq. Satýshylardyń aıtýynsha, aýylda azyq-túlikke qatysty dúrbeleń joq, nandy shetten kelip jumys istep jatqandardy tamaqtandyrý úshin áketip jatyr.
Qyzyljar aýdandyq ákimdiginiń málimetinshe, Beskól aýylynda 14 myńnan astam turǵyn bar. 248 úı qaýipti aýmaqta ornalasqan. Bul úılerde 689 adam turady, olardyń 79-y zeınetker, 170-i bala.
Qazirgi tańda 109 úı sý astynda qaldy.
Eske sala keteıik, buǵan deıin Qazaqstandaǵy sý qoımalary qanshalyqty tolǵanyn jazǵan edik.
