SQO-daǵy Báıterek jáne Beskól turǵyndarynyń mazasyn qashyrǵan qoqys polıgony jabyldy

PETROPAVL. KAZINFORM – Soltústik Qazaqstan oblysy Báıterek aýyly mańynda zańsyz paıda bolǵan qatty turmystyq qaldyqtar polıgony jabyldy. 

Qoqys tógetin oryn eldi meken mańynda birneshe jyl buryn zańsyz paıda bolyp, oǵan jaqyn mańdaǵy on shaqty aýyl turmystyq qaldyqtaryn tógip kelgen. Talap boıynsha qoqys polıgony ormannan – 300, egistik alqabynan – 250 metr, eldi mekennen 1 shaqyrym qashyqtyqta ornalasýy tıis. Alaıda munyń biri de saqtalmaǵan.

Beskól aýyldyq okrýgine qaraıtyn 4 ga aýmaq búginde qoqysqa tolǵan. Jıi órtenip, jaman ıis shyǵatyn polıgonnyń zardabyn jaqyn mańdaǵy aýyldar tartyp keldi. 

Sondaı-aq ruqsatsyz paıda bolǵan qoqys orny Petropavl qalasy áýejaıynyń 13 km aýmaǵynda ornalasqan. 

– Jer ýchaskesi aýyldyq ákimdiktiń balansynda. Onyń qoqysqa tolýyna jáne rekýltıvatsııa jumystarynyń júrgizilýine baılanysty bul polıgonǵa qoqys tastaýǵa tyıym salynady. Qazir aýyldyq okrýg ákimdigi qatty turmystyq qaldyqtar tógetin oryndy daıyndap, zańdastyryp jatyr. Barlyq qujatty tıisti mekemelerde tirkegennen keıin ol iske qosylady, - deıdi Beskól aýyldyq okrýgi ákimi Gúlsim Kárimova. 

Aýyl ákimi bul jaǵdaıǵa túsinistikpen qarap, qoqysty tógýge bolmaıtynyn eske saldy. Ázirge turǵyndarǵa Shahovskoe aýylynyń mańyndaǵy qatty turmystyq qaldyqtar polıgonyn paıdalanýǵa týra kelmek. Al jabylǵanyna qaramastan qoqysyn tókkenderge aıyppul salynbaq. 

Buǵan deıin SQO-da 450 qoqys polıgonynyń tek 11-inde ǵana qujat bar ekenin jazdyq.