SQO-daǵy balabaqshalardyń birinde bıýdjetten 11,2 mln teńge urlanǵan
PETROPAVL. KAZINFORM – Soltústik Qazaqstan oblysynyń prokýrorlary balabaqshalarda balalardyń quqyǵy buzylǵanyn anyqtady.
SQO prokýratýrasynyń málimetinshe, mektepke deıingi uıymdardy tekserý nátıjesinde bıýdjet qarajatyn jymqyrý derekteri, sanıtarlyq jáne órtke qarsy erejelerdi saqtamaý faktileri anyqtaldy. Aıyrtaý aýdanyndaǵy mektepke deıingi mekemede 11,2 mln teńge somasynda bıýdjet qarajaty urlanǵan. Aýdandyq prokýratýra «Senip tapsyrylǵan bireýdiń múlkin ıemdenip alý nemese talan-tarajǵa salý» baby boıynsha sotqa deıingi tergep-tekserýdi bastap, tergeý amaldaryn júrgizip jatyr.
Aqqaıyń, Taıynsha aýdandarynyń balabaqshalarynda memlekettik tapsyrys týraly zań talaptaryna qaıshy, is júzinde balabaqshada bolmaǵan balalarǵa qyzmet kórsetý úshin aqy tólengen. ıAǵnı tárbıelenýshiniń aýyrǵany týraly medıtsınalyq anyqtama nemese ata-anasynan aryz bolmaǵan. Saldarynan bıýdjetten 17 mıllıon teńge qarajat negizsiz alynǵan.
Oblystaǵy barlyq derlik balabaqshalarda sanıtarlyq jáne órtke qarsy erejeler saqtalmaǵan. Prokýrorlyq qadaǵalaý aktileri boıynsha 11 laýazymdy tulǵa tártiptik jáne 32-si ákimshilik jaýapkershilikke tartyldy. 17 mln teńge somasyndaǵy bıýdjet qarajaty ótelip, zańbuzýshylyq joıyldy.
Jalpy, jyl basynan beri prokýratýra 15 myń balanyń quqyǵyn qorǵap, nátıjesinde 300-den astam laýazymdy tulǵa túrli jaýapkershilikke tartyldy.
Buǵan deıin Petropavlda áriptesin abaısyzda atyp óltirgen áskerı qyzmetshiniń 2 jylǵa sottalǵanyn jazǵan edik.
