SQO-daǵy aýdandyq aýrýhanada kúrdeli kardıologııalyq otalar jasalady
PETROPAVL. KAZINFORM - Soltústik Qazaqstan oblysynyń Taıynsha aýdandyq aýrýhanasy qaıtarylǵan aktıvter qarajaty esebinen 1 mlrd 250 mln teńgege jańǵyrtylyp jatyr.
«Aýyldyq densaýlyq saqtaýdy jańǵyrtý» jobasy aıasynda aýrýhananyń materıaldyq-tehnıkalyq bazasy men ınjenerlik ınfraqurylymy tolyq jańalandy. Qabyldaý bólimi halyqaralyq talaptarǵa saı jabdyqtalyp, zamanaýı klınıkalyq-dıagnostıkalyq zerthana ashylady. Qazirdiń ózinde MRT, KT jáne angıografııalyq apparattar ornatylǵan.
Mamandardyń aıtýynsha, jóndeý jumysy aıaqtalǵannan keıin aýdandyq aýrýhanada mı men ókpe qan tamyrlarynyń, qolqanyń angıografııasy, koronarografııa jáne basqa da joǵary tehnologııalyq medıtsınalyq otalar júrgiziledi.
— Kardıologııalyq naýqastarǵa tolyqqandy medıtsınalyq kómek kórsetýge múmkindik bar. Operatsııadan bastap, keıingi emge deıin barlyq kezeńdi qamtı alamyz.
Dıagnostıkalyq múmkindikterimiz de aıtarlyqtaı kúsheıdi. MRT men KT apparattarynyń kómegimen onkologııalyq aýrýlardy erte kezeńde anyqtaýǵa bolady, — deıdi emhana meńgerýshisi Odıljan Arzımatov.
Taıynsha kópsalaly aýdanaralyq aýrýhanasyna búginde 36 myńnan astam adam tirkelgen. Jańǵyrtý jumystary aıaqtalǵan soń aýdan turǵyndaryna kúrdeli dıagnostıka men em alý úshin oblys ortalyǵyna nemese basqa qalaǵa barýdyń qajeti bolmaıdy.
«Aýyldyq densaýlyq saqtaýdy jańǵyrtý» ulttyq jobasy 2023-2026 jyldarǵa shaqtalǵan. Osy ýaqyt aralyǵynda aýyldyq jerlerdegi medıtsınalyq ınfraqurylymdy keshendi túrde jańartý, sapasyn arttyrý jáne turǵyndarǵa qoljetimdi josparlanǵan.
Nátıjesinde 655 alǵashqy medıtsınalyq-sanıtarııalyq nysan salynyp, 1 mln astam aýyl turǵyny medıtsınalyq kómekti turǵylyqty jerinen alý múmkindigine ıe boldy.
Jobanyń kelesi kezeńi aýdandyq aýrýhanalardy jańǵyrtýǵa baǵyttalǵan.
