SQO-daǵy alty aýdanda jedel basqarý ortalyǵyn ashý josparlanǵan
PETROPAVL. KAZINFORM — Soltústik Qazaqstan oblysy Qyzyljar aýdanynda pılottyq joba retinde jedel basqarý ortalyǵy jumys istep tur.
SQO Polıtsııa departamentiniń bastyǵy Abaı Júsipovtyń aıtýynsha, bul — óńirdegi aýyldyq jerde jumys istep turǵan alǵashqy ortalyq. Qyzyljar aýdandyq polıtsııa bólimine qaraıtyn nysanǵa 72 beınekamera jáne 5 apparatty-baǵdarlamalyq keshen qosylǵan. Bıyl bul tájirıbeni oblystyń taǵy alty aýdanynda engizý josparlanyp otyr.
— Óńirde qoǵamdyq qaýipsizdikti qamtamasyz etý maqsatynda beınebaqylaý júıesi qarqyndy damyp keledi. Bul óz nátıjesin berip, kósheler men qoǵamdyq oryndarda qylmys deńgeıi tómendegen. Búginde oblystaǵy áleýmettik ınfraqurylym nysandarynda 47 myńǵa jýyq kamera jumys isteıdi. Onyń ishinde 14 myńnan astamy oblystyq jedel basqarý ortalyǵyna qosylǵan. Byltyr qosymsha 114 beınebaqylaý kamerasy ornatyldy, — deıdi Abaı Júsipov.
Qazir kósheler men qoǵamdyq oryndardy baqylaý maqsatynda 1 160 kamera jumys isteıdi. Sonyń nátıjesinde, bıylǵy alǵashqy eki aıda qoǵamdyq oryndarda tirkelgen qylmystar sany 10% azaıǵan.
— Jedel basqarý ortalyǵynda táýlik boıy qaladaǵy ahýal baqylaýda ustalyp, kez kelgen quqyq buzýshylyqqa jedel áreket etiledi. Sonymen qatar, patrýldik polıtsııa qyzmetkerleriniń jumysy úılestirilip otyrady. Byltyr kameralardyń kómegimen 887 qylmys ashylyp, bul kórsetkish ótken jylmen salystyrǵanda 19% artaty. Sondaı-aq 27 myńnan astam ákimshilik quqyq buzýshylyq anyqtaldy. Al osy jyldyń alǵashqy eki aıynda 152 qylmys ashylyp, 5 myńǵa jýyq quqyq buzýshylyq tirkeldi, — deıdi Abaı Júsipov.
Departament bastyǵynyń aıtýynsha, qazir ákimdiktiń qoldaýymen taǵy 720 beınekamera ornatý jumysy bastaldy. Bul joldar men qoǵamdyq oryndardaǵy qaýipsizdikti odan ári arttyra túspek.
Buǵan deıin SQO-da byltyr ınternet alaıaqtar turǵyndardy 1,4 mlrd teńgege aldaǵanyn jazǵan edik.
