SQO-daǵy Aqjar aýdanynda aǵyn sý joldy shaıyp ketti
PETROPAVL. KAZINFORM — Soltústik Qazaqstan oblysy Aqjar aýdanyndaǵy joldardyń biri aǵyn sýdyń buzyp ótýine baılanysty ýaqytsha jabyldy.
Kýáger túsirgen beınejazbadan jol ústinde or paıda bolǵanyn kórýge bolady. Onyń aıtýynsha, alqaptan kelgen qar sýy bul jerde bolǵan kópirdi shaıyp ketken.
SQO jolaýshylar kóligi jáne avtomobıl joldary basqarmasynyń málimetinshe, bul or Aqjar aýdany Lenıngrad aýyldyq okrýginde ornalasqan «Lenıngrad-Aısary» aýdandyq mańyzy bar avtojolynyń 1-shaqyrymynda búgin tańerteń tańǵy saǵat 9:00 shamasynda paıda boldy.
— Qardyń kúrt erýi saldarynan jınalǵan sý deńgeıi kóterilip, jol jabynyn shaıyp ketý qaýpi paıda bolǵan. Saldaryn azaıtý maqsatynda jol tósemin arnaıy baqylaýmen ashý týraly sheshim qabyldady. Bul shara artyq sýdy ótkizý maqsatynda qolǵa alyndy.
Keshki saǵat 19:00–degi jaǵdaı boıynsha sý deńgeıi tómendegen. Qazirgi ýaqytta joldy qalpyna keltirý jumystary júrgizilip jatyr. Jumysqa 7 tehnıka (2 tıegish, 5 júk kóligi) jáne 10 jumysshy jumyldyrylǵan, — dedi basqarma basshysy Erden Shortybaev.
Jospar boıynsha jóndeý jumysy búgin, 30 naýryz kúni saǵat 22:00–ge deıin aıaqtalmaq.
Qaýipsizdikti qamtamasyz etý maqsatynda jol ýchaskesinde kólik qozǵalysy ýaqytsha shekteldi. Eki jaqtan patrýldik polıtsııa beketteri qoıylyp, 4 qyzmetker men 2 patrýldik kólik kezekshilik atqaryp jatyr.
Mamandardyń túsindirýinshe, sý tasqynyna jer bederiniń ereksheligi, aýa temperatýrasynyń kóterilýi jáne Aqmola oblysyna qarasty kórshiles aýdandardan kelgen mol sý sebep bolǵan.
Buǵan deıin osy Aqjar aýdanynda avtojoldyń ýchaskesin sý basqanyn jazǵan edik.