SQO-da jylytý maýsymynda kómir tapshylyǵy týyndamaýy tıis - Qumar Aqsaqalov
«Kómirdi oblysqa jetkizý bizdiń kúndelikti baqylaýymyzda, ásirese suranysqa ıe Shubarkól kómiri boıynsha. Kúndelikti óńirge 600-1000 tonna mólsherinde jetkiziledi. Qazir burynǵydaı birden talap áketpeıdi, kómir tuıyqtarda qalyp jatyr. Kómir jylytý maýsymy aıaqtalǵanǵa deıin oblysqa ákelinetin bolady. Óıtkeni, keı turǵyndar ony bólip-bólip alady, sondyqtan da tuıyqtarda kómir únemi bolyp, tapshylyq týyndamaýy kerek», - dedi SQO ákimi Qumar Aqsaqalov jylytý maýsymyna baılanysty ótken otyrysta.
Sondaı-aq, «SevKazEnergo» AQ bas dırektory Oleg Perfılov Petropavldaǵy 2-jylý-elektr ortalyǵyndaǵy jaǵdaı týraly baıandady.
«Qazir 5 qazandyq jumys istep tur. Bir qazandyq rezervte, qajet bolǵan jaǵdaıda qosylady. Kestege saı jumys istep jatyrmyz. Qorda 225 myń tonna kómir bar, bul – tıisti normadan eki ese kóp. Sondaı-aq, 705 tonna mazýt jatyr. Aıyna 300 myń tonna mazýt qoldanamyz. Áleýmettik mazýtke kelisimshartqa qol qoıyldy. Qazan aıynda 600 tonnasy jetkizilýi kerek», - dedi Oleg Perfılov.
Aıta ketsek, kóktemde 2-jylý-elektr ortalyǵyndaǵy birinshi tútin murjasy jartylaı qulaǵan bolatyn. Osyǵan baılanysty turǵyndar aldaǵy qysqa alańdaýshylyq bildirgen edi. Mamannyń aıtýynsha, jaǵdaı baqylaýda, bıyl jylýmen qamtýda másele týyndamaýy kerek.
«Barlyq jumys josparǵa saı júrip jatyr. Birinshi tútin murjasyn tolyq buzyp aldyq, alań qoqystan tazartyldy. Ekinshi tútin murjasynyń syrty tolyq jóndeldi, úshinshisinde jóndeý aıaqtaldy. Qazan aıynda qalǵan qazandyqtar da kezekpen iske qosylady. Nátıjesinde aıdyń sońynda 10 qazandyq jumys istemek. 20 qazanda jetinshi týrbına jóndelip bolady», - deıdi Oleg Perfılov.
Buǵan deıin Petropavlda 12 kópqabatty turǵyn úıdiń jylýsyz otyrǵanyn aıtqan edik.
Foto: Soltústik Qazaqstan oblysy ákimdiginiń baspasóz qyzmeti
