SQO-da jylyna 1200 termos-vagon shyǵarylady
PETROPAVL. QazAqparat – Soltústik Qazaqstan oblysyndaǵy eki iri zaýyt óndiristi jańǵyrtyp, óńirdi keshendi damytý baǵdarlamasy aıasynda jańa qondyrǵylarǵa qol jetkizdi, dep habarlaıdy QazAqparat tilshisi.
SQO ákimi Qumar Aqsaqalov óńirdegi iri kásiporyndar – Kırov atyndaǵy zaýyt pen Petropavl aýyr mashına jasaý zaýytynda atqarylyp jatqan jumystar jaıynda aıtty. Olardyń ekeýi de byltyr tehnologııalyq jańǵyrtýdan ótip, jańa ónim shyǵarýdy qolǵa aldy.
Kırov atyndaǵy zaýyt 2 mlrd teńgege zamanaýı qondyrǵy aldy. Endi kompıýterlik tehnıkany shyǵaryp jatyr. Qytaılyq áriptesteriniń kómegimen noýtbýkterdi qurastyrýdan bastaǵan olar birer jylda júıelik bloktar men planshetter óndirisin de jolǵa qoımaq.
«Bir jyldyń ishinde aýqymdy jumys atqaryldy. Kırov atyndaǵy zaýytta jaǵdaı jaqsardy. Qazaqstandyq saýda belgisimen kompıýterlik tehnıkany shyǵaryp jatyr. Petropavl aýyr mashına jasaý zaýytyndaǵy jaǵdaı da túzeledi degen senimdemin. Qazir bul kásiporyn tez buzylatyn azyq-túlikti tasymaldaıtyn termovagondar óndirisin qolǵa aldy», - deıdi Qumar Aqsaqalov.
SQO-ny keshendi damytý baǵdarlamasy aıasynda kásiporynǵa kompıýtermen basqarylatyn 39 qondyrǵy satyp alyndy. Bul eńbek ónimdiligin arttyryp, jańa ónim túrlerin shyǵarýǵa múmkindik bermek.
«Petropavl aýyr mashına jasaý zaýytynda keńestik zamannan beri jabyq jatqan úsh úlken korpýsty ashtyq. Kásiporyndy damytýǵa aqsha quıatyn reseılik ınvestorlardy taptyq. Jaqynda zaýyt tolyqtaı jańarady. Jańa ónim – vagon-termostarǵa suranys óte joǵary. Reseıden alǵashqy tapsyrystar bar. Biz ózimizdiń termovagondarǵa sertıfıkat aldyq. Bolashaǵy zor. Bir vagon 34 mln teńge turady. Bul reseılik ónimnen anaǵurlym arzan», - deıdi óńir basshysy.
Izotermııalyq vagon-termostardyń óndirisimen kásiporynda jańadan 200 jumys orny ashylmaqshy. Zaýyt jylyna 1200 vagon shyǵarýdy josparlaǵan.
