SQO-da jyl sońynda polıtsııa qyzmeti 91 jas mamanmen tolyqty
PETROPAVL. QazAqparat – Soltústik Qazaqstan oblysynda jyl sońynda polıtsııa qatary 91 jas ofıtser jáne serjantpen tolyqty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, vedomstvosynyń bıylǵy sońǵy buıryǵy shyǵyp, 91 jigit jumysqa alyndy. 15 maman laýazymǵa taǵaıyndalsa, 8 ofıtser qurmetti eńbek demalysyna shyqty.
Polıtsııa qataryna alynǵandardyń ishinde áke jolyn qýǵandar da bar. Ýálıhanov aýdanyndaǵy Orazovtar otbasy úshin búgin erekshe kún. Polıtsııa maıory Qalqaman Orazov quqyqtyq tártip organdarynda 27 jyl qyzmet atqardy. 30 jeltoqsanda zeınetke shyqqan polıtseı, bul kúni qyzmetke alǵash kirisken ulyna ofıtser pogonyn tabys etti.
Patrýldik polıtsııa batalonynyń aǵa ınspektory eki ulynyń izin basyp, áke jolyn jalǵaǵanyn armandaǵan. Endi úlken uly Oljas «zańtaný» mamandyǵy boıynsha ýnıversıtetti aıaqtap, aýdandyq polıtsııa bólimine tergeýshi bolyp jumysqa ornalasty. Al kenje uly Almat aldaǵy jyly QR ІІM joǵarǵy oqý ornyna túsýdi josparlap otyr.
«Men uldaryma júregiń qalaǵan joldy tańda dep aıtqanymmen, olardyń men sııaqty polıtsııa qyzmetkeri bolǵanyn qaladym. Tuńǵyshym qyzmetke endi kirisip jatyr. Balam halyqqa, Otanǵa adal qyzmet etedi dep senemin», - deıdi Qalqaman Orazov.
