SQO-da jyl sońyna deıin 5 jańa sút fermasy iske qosylmaq
SQO ákimi Qumar Aqsaqalov Aqqaıyń aýdanynda bolyp, bıyl salynǵan jańa fermanyń jumysyn kórdi. Bul jaıynda oblys basshysy áleýmettik jelidegi paraqshasynda jazdy. Jańa sút fermasyna Gennadıı Zenchenkonyń nemeresi Ivan Zenchenko 1,2 mlrd teńge ınvestıtsııa quıǵan.
«Gennadıı Ivanovıch Zenchenko 2008 jyly elimizde alǵashqylardyń biri bolyp Elbasynyń qolynan «Qazaqstannyń Eńbek Eri» Altyn Juldyzyn aldy. Arada 12 jyl ótkende, nemeresi Ivan Zenchenko zamanaýı ferma salyp, atasynyń isin jalǵastyryp jatyr. Gennadıı Ivanovıch nemeresin janynan tastamaı, eńbekke baýlydy, jerge, eńbekke jáne adamdarǵa degen súıispenshilikti qalyptastyrdy», - dep jazdy óńir basshysy.
Ýnıversıtetten keıin Ivan Zenchenko aýylǵa oralyp, sodan beri ol aýyldastarymen birge talmaı eńbek etip jatyr.
«Ol qalada qalyp, barlyq protsesti qashyqtan basqarýyna bolar edi. Byltyr Ivannyń uly dúnıege keldi. Gennadıı Ivanovıchtiń shóberesi Zenchenko otbasynyń eńbek dınastııasyn jalǵastyryp jatyr. Urpaqtar sabaqtastyǵy aýyldardy saqtaýǵa jáne damytýǵa, aýyl turǵyndarynyń ómir súrý sapasyn jaqsartýǵa múmkindik beredi», - deıdi óz jazbasynda Qumar Aqsaqalov.
Jańadan salynǵan sút fermasy tsıfrly jáne avtomattandyrylǵan. Tolyq qýatyna kóshkende 40 adamǵa deıin jumys isteıtin bolady. Zamanaýı ferma jylyna 10 myń tonnaǵa deıin sút óndirmek.
«Aıdyń aıaǵyna deıin biz oblysta 5 jańa fermany iske qosamyz. Bıyl oblysta barlyǵy 11 sút kesheni salynyp jatyr. Sút fermalarynyń qurylysyna memleket 3 mlrd teńge kóleminde qarjylaı kómek kórsetkenin atap ótken jón. Bıyl Qazaqstanda 20 ferma iske qosylǵan, olardyń ár tórtinshisi Soltústik Qazaqstan oblysynda ashylady», - deıdi oblys ákimi.
Qumar Aqsaqalovtyń aıtýynsha, keler jyly oblysta taǵy 10 fermanyń qurylysy bastalady. Jalpy óńirde 21 fermanyń iske qosylýy jyl saıyn 51 myń tonnadan astam sút óndirýge jáne 500 aýyl turǵynyn jumyspen qamtýǵa múmkindik beredi.
