SQO-da jyl saıyn 60 myńnan astam áıel jatyr moıny qaterli isigine tekseriledi
PETROPAVL. QazAqparat – Soltústik Qazaqstan oblysynda jatyr moınynyń qaterli isigin erte bastan anyqtaý maqsatynda jyl saıyn 60 myńnan astam zertteý júrgiziledi, dep habarlaıdy QazAqparat tilshisi.
SQO onkologııalyq ortalyqtyń zerthana meńgerýshisi Farıda Tıýmenevanyń aıtýynsha, onkodıspanserde 40 jyldan artyq tsıtologııalyq skrınıng júzege asyrylyp keledi. Zertteýdiń bul túri jatyr moıny isigin erte bastan anyqtaýǵa múmkindik beredi.
«Jatyr moınynda qaterli isik paıda bolýy múmkin táýekel tobyn jasaqtaý úshin áıelderdi jappaı tsıtologııalyq tekseristen ótkizý kerek.
Emhanalarda qaraý kabınetteri bar, gınekologtar da qabyldaýǵa kelgen barlyq áıelderden zertteý úshin materıal alady. Munda olardyń jasyna shekteý joq», - deıdi Farıda Tıýmeneva.
«Alynǵan materıal ortalyqtandyrylǵan tsıtologııalyq zerthanaǵa jiberiledi. Bul jerde jylyna 60 myńnan astam zertteý jasalady.
Nátıjesinde orta eseppen 2 myńnan astam áıel táýekel tobyna alynsa, sońǵy 5 jyl boıy 40-qa jýyq adamnan jatyr moıny qaterli isigi anyqtalyp keledi», - deıdi zerthana meńgerýshisi.
Dárigerlerdiń aıtýynsha, bul aýrý negizinen 40-50 jastaǵy áıelder arasynda jıi kezdesedi. Biraq sońǵy kezde 35 jasqa jetpegen qyz-kelinshekterde de anyqtala bastaǵan.
«Jatyr moıny obyryn emdeýge bolady. Óıtkeni qaterli isik aqyryn ósedi jáne gınekologııalyq baqylaý kezinde ony asqyndyrmaı kórýge bolady.
Aýrýdyń paıda bolýyna kóp nárse áser etedi. Munyń ishinde tuqym qýalaýshylyq ta bar. Jynystyq qatynasqa erte – 14-18 jastan barý, temeki shegý, beı-bereket jynystyq qatynas, gormonaldy preparattardy qabyldaý, erozııa sııaqty aýrýlardy der kezinde emdetpeý obyrdyń damýyna ákelýi múmkin», - deıdi SQO kópbeıindi aýrýhananyń onkologııalyq aýrýhanasynyń onkolog dárigeri Irına Astanına.
Jatyr moıny qaterli isigi kópke deıin syr bermeıdi, aýyrmaıdy. Tek asqynǵan kezde ǵana áıeldiń mazasyn alýy múmkin. Sol sebepti dárigerler áıelderge jylyna bir ret gınekolog mamanǵa kórinip turýǵa keńes beredi.
