SQO-da jyl basynan mas júrgizýshilerdiń kinásinen 6 adam qaza tapty
PETROPAVL. QazAqparat – Soltústik Qazaqstan oblysynda bıyl mas júrgizýshilerdiń kinásinen 6 adam qaza taýyp, 32-si jaraqat aldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Tımırıazev eldimekeninde kóshelerdiń birinen aýdandyq polıtsııa bóliminiń qyzmetkerleri «VAZ 2106» avtomashınasyn baıqaıdy. Onyń ıesin tártip saqshylary eki aı buryn ǵana kólikti mas júrgizgeni úshin ustap, sot 7 jylǵa kólik basqarý quqyǵynan aıyrdy.
Polıtseıler kólikti toqtatty. Rólde kólik ıesi - júrgizý quqyǵy joq 38 jastaǵy aýyl turǵyny bolǵan. Er adamnan alkogoldiń ıisi shyqqan. Medıtsınalyq kýálandyrý onyń ortasha deńgeıde mas ekendigin kórsetti.
Atalǵan fakti «Kólik quraldaryn basqarý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn basqarýdy osyndaı adamǵa berý nemese kólik quralyn osyndaı adamnyń basqarýyna jol berý» baby boıynsha Sotqa deıingi tergep-tekserýdiń biryńǵaı tizilimine engizildi. Quqyq buzýshy ýaqytsha ustaý ızolıatoryna qamalyp, avtomobıl aıyp turaǵyna qoıyldy.
Ustalǵan er adamnyń aıtýynsha, kóligin satý úshin onyń jaǵdaıyn teksermekshi bolǵan.
«Jyl basynan mas júrgizýshilerdiń kinásinen 25 jol-kólik oqıǵasy tirkelip, saldarynan 6 adam qaza tapty jáne 32-si jaraqat aldy. Adam ómiri men densaýlyǵyna qaýip tóndiretin mundaı kólik júrgizýshilerine, ásirese, bile tura, quqyq buzýshylyqqa qaıta barǵan avtomobılısterge qatysty zań boıynsha qatań sharalar qarastyrylǵan», - deıdi SQO PD JPQ basqarmasy bastyǵynyń orynbasary Aleksandr Rozbah.
