SQO-da jyl basynan mas júrgizýshiler 5 jol apatyn jasady
PETROPAVL. QazAqparat – Soltústik Qazaqstan oblysynda jyl basynan avtokólikti mas kúıde basqarýdyń 68 deregi tirkelse, sonyń beseýinde júrgizýshiler kólik apatyna jol bergen, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Taıynsha aýdanynda mas kúıde kólik tizgindep, jol apaty ornynan izin sýytqan júrgizýshige qatysty sot otyrysy ótti.
1 qańtar kúni «Toyota Mark II» avtokóligin basqarǵan 23 jastaǵy aýdan turǵyny «Mercedes-Benz» avtomobılimen soqtyǵysty. Kólik ishindegi eki adam zardap shekpegenimen, mashınaǵa zaqym kelgen. Kináli oqıǵa ornynan izin sýytqan. Polıtseıler ony birneshe saǵat ishinde anyqtap, ustady. Medıtsınalyq kýálandyrý onyń mas bolǵanyn kórsetti.
Sottyń úkimimen aýyl turǵyny 5 jyl merzimge kólik quralyn basqarý quqyǵynan aıyryldy.
Oblysta jyl basynan avtokólikti mas kúıde basqarýdyń 68 deregi anyqtaldy, sonyń beseýinde júrgizýshiler jol-kólik oqıǵasyna jol bergen. 59 fakti boıynsha materıaldar sotqa jiberildi. 54 júrgizýshi ákimshilik jaýapkershilikke tartyldy, 29-y ákimshilik qamaqqa alyndy, 42 júrgizýshi basqarý quqyǵynan aıyryldy.
