SQO-da jyl basynan mas kúıde 701 qylmys jasalǵan
PETROPAVL. QazAqparat – Petropavlda tanystarymen birge otyryp ishimdik ishken eki turǵyn uıaly telefondarynan, sondaı-aq 30 myń teńgesinen aıyryldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavlda bir kúnde bir «stsenarıı» boıynsha eki urlyq jasalǵan.
Petropavldyń 38 jastaǵy turǵyny páterinen quny 65 myń teńge turatyn «Samsung» uıaly telefonynyń joǵalǵanyn aıtyp, polıtsııaǵa júgingen. Ol bul urlyqty 1989 jyly týǵan kórshisinen kórgen.
Onyń aıtýynsha, jaqynda kórshisimen ekeýi ishimdik ishken, keıin telefonynyń joǵalǵanyn baıqaǵan. Oqıǵa ornyna kelgen jedel-tergeý toby qala turǵynynyń kúdigin rastap berdi. Urlanǵan zat alynyp, atalǵan fakti «Urlyq» boıynsha Sotqa deıingi tergep-tekserýdiń biryńǵaı tizilmine engizildi.
Petropavldyń 1990 jyly týǵan kelesi bir turǵyny osyǵan uqsas jaǵdaıǵa tap bolǵan. Ol tanysymen birge otyryp ishimdik ishý saldarynan «Samsung J2» telefony men 30 myń teńge aqshasynan aıyryldy. Keltirilgen shyǵyn somasy 50 myń teńge. Polıtseıler bul urlyqqa onyń 21 jastaǵy tanysynyń qatysy baryn anyqtady.
«Іshimdiktiń býy adamdardy qylmys jasaýǵa ıtermeleıdi, osyndaı jaǵdaılar, ókinishke oraı jıi tirkeledi. Osy eki jaǵdaıda da kúdiktiler buryn múliktik qylmystar jasaǵany úshin qylmystyq jaýapkershilikke tartylǵanyn atap ketken jón. Qala turǵyndaryn aqsha men qundy zattaryn qaraýsyz qaldyrmaýǵa, sondaı-aq spırttik ishimdikterdi asyra paıdalanýdan aýlaq bolýǵa keńes beremiz», - deıdi SQO PD bastyǵynyń orynbasary Eńbek Sembın.
Jalpy SQO-da bıylǵy 9 aıda mas kúıde 701 qylmys jasalǵan.
