SQO-da jyl basynan kolonııalarǵa 60 uıaly telefon ótkizilmek bolǵan

PETROPAVL. QazAqparat – Soltústik Qazaqstan oblysynda qylmystyq atqarý júıesiniń maksımaldy qaýipsizdiktegi №51 mekemesine Aqtóbe turǵyny 4 uıaly telefondy kirgizbek boldy, dep habarlaıdy QazAqparat tilshisi.

SQO boıynsha qylmystyq atqarý júıesi departamenti baspasóz qyzmetiniń málimetinshe, №51 mekeme qyzmetkerlerine quqyq buzýshy jaıynda jedel aqparat túsken. Nátıjesinde maksımaldy qaýipsizdik mekemesinde jazasyn ótep jatqan sottalǵanǵa sálemdeme berý kezinde mamandar spýtnıktik antennaǵa arnalǵan tıýnerden Samsung markaly 4 uıaly telefon jáne Altel uıaly baılanysynyń 1 sım-kartasyn taýyp, tárkiledi. Tyıym salynǵan zattar qýat kózi mýlıajynda jasyrylǵan eken.

Sálemdeme tonaý qylmysy úshin jazasyn ótep jatqan sottalǵanǵa arnalǵan. Ony Aqtóbe qalasynyń turǵyny jibergen. Zańdy buzǵan áıelge qatysty materıal jınalyp, tıisti sheshim qabyldaý úshin turǵylyqty jeri boıynsha sotqa jiberildi. QR Ákimshilik quqyq buzýshylyq týraly kodekstiń 481-babynyń 1-bóligine sáıkes ol eskertý alýy nemese 10 AEK - 34500 teńge mólsherinde aıyppul túrinde ákimshilik jaýapkershilikke tartylýy múmkin.

Jalpy bıyl jyl basynan SQO boıynsha QAJD vedomstvolyq baǵynysty mekemeleriniń qyzmetkerleri tyıym salynǵan zattardy laqtyrý, sálemdemeler, avtomobılder jáne azyq-túlik arqyly ótkizbek bolý áreketteri kezinde barlyǵy 60 uıaly telefondy taýyp tárkiledi.