SQO-da jyl basynan qarý ustap júrýge 1,6 myń adamǵa ruqsat berildi

PETROPAVL. QazAqparat – Soltústik Qazaqstan oblysynyń Polıtsııa departamenti jyl basynan qarýdy saqtap, alyp júrýge ruqsat berý boıynsha 1613 adamǵa memlekettik qyzmet kórsetti, dep habarlaıdy QazAqparat tilshisi.

Polıtsııa departamenti baspasóz qyzmetiniń málimetinshe, memlekettik qyzmettiń bul túri turǵyndar arasynda suranysqa ıe. Ruqsatty qarýdy alǵash satyp alǵandar jáne burynnan barlary alýy kerek. Buǵan deıin ruqsat qujattyń merzimin uzartýǵa múmkin bolsa, endi ár bes jyl saıyn ony jańadan alý qajet. Bul qyzmet «elektrondyq úkimet» portaly arqyly kórsetiledi.

«Qazir azamattyq jáne qyzmettik qarý aınalymyn baqylaý boıynsha bólimshelerdiń barlyq qyzmeti qashyqtan kórsetiledi. Bul, turǵyndarǵa yńǵaıly bolýy jáne sybaılas jemqorlyqtyń aldyn alý úshin jasalǵan. Memlekettik qyzmet kórsetýdiń jańa standarty QR ІІM-niń bıylǵy 27 naýryzdaǵy № 254 buıryǵymen bekitilgen. Barlyq qyzmetter elektrondyq formatqa kóshirilgen. Olardyń sany 8-den 6-ǵa deıin qysqardy. Uzartýdan bólek, komıssııalyq satýǵa joldama da berilmeıtin boldy. Endi qarýdy komıssııalyq dúkenge tapsyrǵan kezde ruqsat qujat pen jeke kýálikti kórsetý jetkilikti», - dedi SQO Polıtsııa departamenti bastyǵynyń birinshi orynbasary Qanat Aıtbaev.

Polıtseılerdiń aıtýynsha, keı qarý ıeleri «elektrondyq úkimet» portalyn paıdalaný barysynda qıyndyqqa kezdesip jatady. Sol úshin Halyqqa qyzmet kórsetý ortalyǵynda «E-lıtsenzııalaý» aqparattyq júıesinen qyzmetti izdeý qajet. Al úı kompıýterinen kirgen jaıdaıda egov.kz saıty arqyly izdeýge bolady. Máselen, «qarýdy tirkeý» saýalyn engizgen kezde «Qazaqstanda qarýdy tirkeý» degen betke shyǵady. Sol jerde qajetti qyzmetti tańdaýǵa bolady.

SQO-da jyl basynan polıtsııa bólimsheleri qarý-jaraqqa qatysty 2390 memlekettik qyzmet kórsetti. Sonyń ishinde 1613 adam qarýdy saqtap, alyp júrýge ruqsat alǵan.