SQO-da jyl basynan iz-túzsiz joǵalǵan 92 adam tabyldy
PETROPAVL. QazAqparat – Soltústik Qazaqstan oblysynda jyl basynan 93 adam iz-tússiz joǵalsa, sonyń 92-si aman-esen tabyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, iz-túzsiz joǵalǵandardy izdeýmen krımınaldyq polıtsııa aınalysady. Tártip saqshylary joǵalatyndardy negizgi eki sanatqa bólgen. Olardyń bir bóligi týystaryna jónin aıtpaı tabys tabýǵa ketetinder bolsa, ekinshisi ishimdikke áýestikten qańǵyryp ketetinder.
Petropavldyń 34 jastaǵy turǵynyn krımınaldyq polıtsııa qyzmetkerleri oblys aýdandarynyń birinen tapty. Onyń jumysqa ornalasqan jerinde baılanys bolmaǵandyqtan anasyna qońyraý soǵa almaǵan. Al 27 jastaǵy qala turǵyny týystarymen qarym-qatynasy kelispegendikten olardyń qońyraýlaryna jaýap bermegen. Polıtseıler jigitti bir aptadan artyq izdep, tapty.
Oblys ortalyǵynyń izdeýde júrgen taǵy bir turǵyny oıda-joqta qala kóshelerinen tabyldy. Patrýldik polıtsııa qyzmetkerleri qala kósheleriniń birinde «Volkswagen» avtomashınasyn toqtatqan. Onyń júrgizýshisi - 35 jastaǵy er adamnyń rólge mas kúıde otyrǵandyǵy anyqtaldy. Ákimshilik hattama toltyrý barysynda ony týystarynyń birneshe kún boıy izdep jatqandyǵy belgili boldy.
Jalpy, ár besinshi jaǵdaıda joǵalǵandar mastardyń ortasynan, ádette tanystarynyń úıinen nemese jaldamaly páterlerden tabylady eken.
«Jaqyndaryńyzdy qaıda júrgenińiz jaıynda eskertip otyrǵan jón. Kópshilik týystarynyń mazasyzdanyp izdeıtinin eskermeıdi nemese mán bermeıdi. Saldarynan tártip saqshylary olardy kúni-túni izdep, qanshama jumys atqarady. Polıtseılermen birge «Qamqor» klýby men «Lıder» qoǵamynyń volonterleri de tynym kórmeıdi. Olar aýdandarǵa shyǵady, áleýmettik jelilerde belsendi jumys júrgizedi», - deıdi SQO PD bastyǵynyń orynbasary Rýslan Nazarov.
Bıyl SQO-da iz-túzsiz joǵalǵan 93 adam tirkeldi, onyń 17-si maskúnem. Qazirgi ýaqytta 92-si tabyldy. Sonymen qatar, ótken jyldary joǵalǵan adamdar 44 adam izdestirilip jatyr.
