SQO-da jyl basynan beri ýly gazdan qorǵaıtyn 348 qondyrǵy ornatyldy

PETROPAVL. QazAqparat – Soltústik Qazaqstan oblysynda bıyl 600-ge jýyq órt tirkeldi. Tilsiz jaýmen kúresý maqsatynda mamandar kún saıyn reıd uıymdastyryp, órtke qarsy datchıkterdi ornatyp jatyr, dep habarlaıdy QazAqparat tilshisi.

SQO Tótenshe jaǵdaılar departamenti baspasóz qyzmetiniń málimetinshe, mamandar ásirese jeke turǵyn úı sektoryn nazarǵa alǵan. Óıtkeni órttiń 80% turǵyn úı sektorynda shyǵady.

«Oblysta jylytý maýsymy bastalǵaly 40-tan astam órt tirkeldi. Tilsiz jaýdan 3 adam kóz jumyp, 4 kisi jaraqat aldy. Jalpy, bıyl órtten qaza tapqandardyń sany 22% artyp, 30-dan astam adam mert boldy. Sondaı-aq 23 turǵyn túrli dene jaraqatyn alǵan», - deıdi SQO TJD basqarmasynyń bastyǵy Igor Baleev.

Órttiń aldyn alý maqsatynda tótenshe jaǵdaılar departamentiniń mamandary jylytý maýsymy bastalǵannan beri 32 myńnan astam baspanany aralaǵan. Reıdke qalalyq máslıhattyń depýtattary da qatysyp, turmystaǵy órt qaýipsizdigi erejelerin saqtaý qajettigi týraly, peshti, gaz jáne elektr quraldaryn paıdalaný kezinde abaı bolýdy eskertip jatyr. Osyndaı is-sharalar barysynda áleýmettik jaǵdaıy nashar otbasylardyń úılerine órtke qarsy datchıkter ornatylady.

Petropavl qalasy Jumysshy kentiniń turǵyny Elena Danılenkonyń jeti balasy bar. Eń kishkentaıy 5-te ǵana. Danılenkonyń úıine de órtke qarsy qondyrǵy qoıyldy. Jalpy, jyl basynan oblys boıynsha kópbalaly otbasylardyń, jalǵyz basty zeınetkerler men múmkindigi shekteýli adamdardyń úıine 348 ýly gaz «datchıgi» ornatyldy.