SQO-da jyl basynan beri iz-túzsiz joǵalǵan 58 adam tabyldy
PETROPAVL. QazAqparat – Soltústik Qazaqstan oblysynda polıtseıler jyl basynan habarsyz ketken 58 adamdy izdep tapty, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Petropavldaǵy 20 yqshamaýdannyń 38 jastaǵy turǵyny sheshesine aıtpaı belgisiz jaqqa ketken. Anasy qyzyn áne-mine keledi dep bir aıǵa jýyq kútip, bolmaǵan soń polıtsııaǵa aryzdanady. Aıtýynsha, qyzy ishimdikke jaqyn, buǵan deıin de eshkimdi eskertpeı úıinen birneshe ret ketken. Tártip saqshylary ony 6 kún izdep, qaladaǵy aýdandardyń birinde turatyn qurbysynyń úıinen tapty.
Áıel anasynyń ózin izdep polıtsııaǵa júgingenine tań qaldy. Ol úshin úıden aılap ketý – qalypty jaǵdaı bolyp shyqty.
Jalpy, úıinen eshkimdi eskertpeı ketetinder jaqyndarynyń izdep, ýaıymdaıtynyna mán bermeıdi. Jasóspirimder dostarynyń úıinde túneýge qalyp, bul týraly ata-analaryna habarlaspaı, telefondaryn sóndirip qoıady. Eresekter iz-túzsiz ketip, bótelkelesterimen bas qosqandy táýir kóredi. Jyl basynan oblysta adamdardyń joǵalýynyń 58 deregi tirkeldi, onyń 16-sy: 9 er adam jáne 7 áıel - ishimdikti asyra paıdalanatyndar. Barlyq joǵalǵandar tabyldy, onyń ishinde 47 adam bir táýlikte tabyldy», - deıdi SQO PD bastyǵynyń orynbasary Rýslan Nazarov.
