SQO-da jyl basynan beri bir keliden astam sıntetıkalyq esirtki tárkilendi
SQO polıtsııa departamenti baspasóz qyzmetiniń málimetinshe, esirtki qylmysyna qarsy is-qımyl basqarmasynyń qyzmetkerleri birinshi
toqsandaǵy jumystaryn qorytyndylady. Basqarma óz jumysynda sıntetıkalyq esirtkilerge qarsy kúreske basymdyq beredi. Esirtkiniń bul túri basqalaryna qaraǵanda keltiretin zalaly boıynsha asa qaýipti. Budan bólek, sońǵy kezde esirtki saýdasy zamanaýı tehnologııalar arqyly baılanyssyz júzege asyrylady.
Jyl basynan oblysta esirtki saýdasyna qatysy bar degen kúdikpen 29 adam ustaldy. Onyń 7-ýi sıntetıkalyq esirtkilerdiń óndirisin uıymdastyrǵany úshin, 3-ýi tyıym salynǵan zattardy satatyn ınternet-dúkenderdiń qyzmetin uıymdastyrǵany úshin jaýap bermek. Budan bólek, 2 adam esirtkini jasyryn orynǵa salyp ketkeni úshin qylmystyq jaýapkershilikke tartyldy. Máselen, aqpan aıynyń ortasynda jedel-izdestirý is-sharalary nátıjesinde asa iri kólemdegi zańsyz esirtki aınalymyna qatysy bar degen kúdikpen Aqmola oblysynyń 19 jastaǵy turǵyny ustaldy. Jigittiń kórsetýi boıynsha jasyrǵan 30 orynnan salmaǵy
41,49 gramm krıstall tárizdes zaty bar polımerlik túıinshekter alyndy.
Sondaı-aq, onyń turǵylyqty jerinen 23 túıinshek tabyldy. Onda salmaǵy 82,15 gramm esirtkige uqsas zat bolǵan.
«Saraptamalardyń nátıjeleri boıynsha bul zattar «tuz» jáne «mefedron» bolyp shyqty. Kókshetaý qalasyndaǵy oqý oryndarynyń birinde oqıtyn jigit Petropavlǵa kelgen. Ol jedel ýákilderdiń nazaryna iligip, qylmys ústinde ustaldy. Áleýmettik jelilerde
turǵyndar polıtseılerden esirtki taratýshy bolýy múmkin adamdy kórgen jaǵdaıda ne isteýge bolatynyn surap jatady. «102» arnasyna nemese basqarmanyń 8 7152 39-41-93 senim telefonyna habarlasýǵa bolady.
WhatsApp messendjerindegi +7-707-500-96-65 nómirinde chat jumys isteıdi.
Instagram, Facebook, VKontakte áleýmettik jelilerinde upn_dp_sko akkaýntary bar, paraqshalarda habarlama qaldyrýǵa bolady», - deıdi SQO PD Esirtki qylmysyna qarsy is-qımyl basqarmasynyń bastyǵy Jandos Basybaev.
3 aıdyń ishinde SQO-da polıtseıler zańsyz aınalymnan 25,5 keli túrli esirtki tárkiledi, onyń 1 keliden astamy sıntetıkalyq esirtki.
