SQO-da jyl basynan beri 62 adam Qazaqstan qujatyn aldy
PETROPAVL. QazAqparat – Soltústik Qazaqstan oblysynda bıyl qujatsyz júrgen 62 adamnyń quqyqtyq mártebesi anyqtalyp, Qazaqstan qujatyn aldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Taıynsha aýdanynyń 27 jastaǵy turǵyny qujattaryn retke keltirýge kómekteskeni úshin tártip saqshylaryna alǵysyn bildirdi.
Kelinshek Reseıdiń Krasnoıar ólkesinde dúnıege kelgen. Ol eki jasta bolǵanda áke-sheshesi Soltústik Qazaqstanǵa qaıtyp oralǵan. Qyzdarynyń qujattaryn der kezinde durystamaǵandyqtan ol qazir ne Qazaqstannyń ne Reseıdiń azamatshasy emes.
Aýdandyq kóshi-qon qyzmeti tobynyń qyzmetkerleri áıelde basqa eldiń azamattyǵy joq ekendigine kóz jetkizip, oǵan jeke kýálik istep berdi. Ázirshe áıel azamattyǵy joq tulǵa mártebesimen júredi. Bes jyldan keıin Qazaqstan azamattyǵyn alýǵa quqyly.
«Polıtsııa qyzmetkerlerine zańdy mártebesi retke keltirilmegen adamdardyń máselelerin tolyǵymen sheshý tapsyryldy. Túrli sebeptermen aýdan turǵyndary ýaqytynda qujattaryn ala almaı qalǵan. Kópshiligi kóship-qonýǵa baılanysty, endi biri otbasylyq jaǵdaılarǵa baılanysty qujattaryn ýaqytynda ala almaǵan. Kóshi-qon qyzmetiniń qyzmetkerleri qolynda qujattary joq adamdarǵa olardyń quqyqtyq mártebesin qalaı retteýge bolatyndyǵyn túsindirip, aqparat beredi. Kúzden bastap, quqyqtyq mártebesi rettelmegen adamdardy qujattandyrý aktsııasy aıasynda aýdannyń jeti turǵynyń Qazaqstan Respýblıkasynyń azamattyǵy rastaldy. Eki adamnyń 1974 jylǵy úlgidegi pasporty aýystyryldy. Olardyń barlyǵy QR azamattarynyń jeke kýálikterin aldy, odan ári jumys júrgizilýde», - deıdi aýdandyq polıtsııa bóliminiń bastyǵy Nurlyjan Aqtanov.
Óńirde aktsııa aıasynda 5 adam azamattyǵy joq tulǵalardyń kýálikterin aldy. 38 soltústikqazaqstandyq QR qujatyn aldy, jalpy jyl basynan osyndaı qyzmet 62 adamǵa kórsetildi.
