SQO-da jyl basynan beri 600-den astam mas júrgizýshi ustaldy
PETROPAVL. QazAqparat - Jyl basynan beri SQO polıtseıleri 600-den astam mas júrgizýshini ustady, – dep habarlaıdy QazAqparat.
Qyzyljar aýdany Olshanka aýylynyń mańynda VAZ 2174 avtokóligi toqtatyldy. Rólde 33 jastaǵy petropavldyq bolǵan, odan spırttik ishimdiktiń ıisi bilingen. Medıtsınalyq kýálandyrý onyń alkogoldik masań kúıde bolǵanyn kórsetti. Polıtseıler Ákimshilik quqyq buzýshylyq týraly kodekstiń 608-baby (Júrgizýshiniń kólik quralyn alkogoldik masań kúıde basqarýy) boıynsha materıal jınastyrdy. Baptyń sanktsııasymen 15 táýlikke deıin ákimshilik qamaýǵa alý túrindegi jaza kózdelgen.
Dál sol kúni masań kúıde kólik basqarý faktisi oblys ortalyǵynyń mańynan anyqtaldy. VAZ-2112 avtokóligin 23 jastaǵy qala turǵyny basqarǵan. Ol Jezqazǵan – Petropavl avtojolynda shamamen tańǵy saǵat 04.00-de ustaldy. Tekseris barysynda onda kólik quralyn basqarý quqyǵynyń joqtyǵy anyqtaldy. Er adam 20 táýlikke qamaýǵa alynýy múmkin.
«Taǵy bir uqsas jaǵdaı kelesi kúni Aqqaıyń aýdanynda anyqtaldy. Patrýldik polıtseıler MTZ-80 traktoryn basqaryp kele jatqan, 35 jastaǵy mas aýyl turǵynyn toqtatqan, onda kólik quralyn basqarý quqyǵy bolmaǵan. Masań kúıde kólik quralyn basqarý barlyq jol qozǵalysyna qatysýshylarǵa qaýip tóndiredi. Mas júrgizýshi – qylmyskerge aınalýy múmkin. Osyǵan uqsas faktilerdi anyqtaý – patrýldik polıtsııa jumysyndaǵy erekshe baǵyt. Jyl basynan beri SQO-da avtokólikti masań kúıde basqarýdyń 655 faktisi anyqtaldy», – deıdi SQO PD Jergilikti polıtsııa qyzmeti basqarmasy bastyǵynyń mindetin atqarýshy Aleksandr Rozbah.
