SQO-da jyl basynan beri 33 adam órtten qaza tapty
PETROPAVL. QazAqparat – Soltústik Qazaqstan oblysynda bıyl órtten kelgen materıaldyq shyǵynnyń kólemi byltyrǵymen salystyrǵanda 73 % artyp, 325 mln teńgege jetti, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, oblys aýmaǵynda bıyl 486 órt tirkelgen, bul ótken jyldan shamamen 6% az. Byltyr 37 adamnyń ajaly órtten bolsa, bıyl 33 adam qaza tapty. Jaraqat alǵandardyń sany da shamamen eki ese azaıǵan, 15 adam em aldy. Al shyǵyn mólsheri kerisinshe 73 % artyp, 325 mln teńgeni qurady.
«Órttiń 75%-y jeke sektordan shyqqan. Basty sebepteri elektr quraldaryn ornatý jáne paıdalanýda erejeni saqtamaý. Peshti durys qoldanbaý jáne otty qoldanýdaǵ salaqtyq.
Órttiń aldyn alý úshin maýsym aıynan bastap turmysy tómen otbasylardyń 967-sine datchıkter qoıyldy, ol tútin ne ýly gaz shyqqanda habar beredi. Jaqynda taǵy 450-den astamy ornatylady», - deıdi SQO TJD Memlekettik órt baqylaý basqarmasynyń bastyǵy Aslan Ahmetjanov.
Qazir oblys aýmaǵynda órt qaýipsizdigi aılyǵy júrip jatyr. Mamandar áeýmettik osal topqa jatatyn 44,5 myńǵa jýyq baspanany esepke alǵan, bul úılerde 12,5 myń adam turady. Birinshi kezekte osy turǵyndarmen profılaktıkalyq jumystar júrgizilip, úılerindegi peshterdiń, elektr qondyrǵylarynyń jaǵdaıy tekserildi. Bul jumysqa qyzmettiń 600-den astam mamany tartylǵan.
