SQO-da jyl basynan beri 25 myń sharshy metr turǵyn úı paıdalanýǵa berildi
PETROPAVL. QazAqparat – Soltústik Qazaqstan oblysynda qańtar-naýryz aılarynda qurylys jumystarynyń aýqymy 1,5 ese, negizgi kapıtalǵa salynǵan ınvestıtsııalar – 20,6%, ónerkásip óndirisi – 10,2% ósti, dep habarlaıdy QazAqparat tilshisi.
QR Strategııalyq josparlaý jáne reformalar agenttigi Ulttyq statıstıka bıýrosynyń SQO boıynsha departamentiniń málimetinshe, bıylǵy qańtar-naýryzda negizgi kapıtalǵa quıylǵan ınvestıtsııalar kólemi 45,2 mlrd teńgeni qurady. Sharýashylyq júrgizetin sýbektiler negizgi kapıtalǵa salynǵan ınvestıtsııalardy qarjylandyrýdyń negizgi kózi. Olar ınvestıtsııalardyń jalpy kóleminiń 63,9 %-yn alady.
Negizgi kapıtalǵa quıylǵan ınvestıtsııalardyń 59,3 %-y aýyl, orman jáne balyq sharýashylyǵy, 16,2 %-y jyljymaıtyn múlikpen jasalatyn operatsııalar, 12,3 %-y ónerkásip salalarynda ıgerilgen.
2021 jylǵy qańtar-jeltoqsanda aýyl sharýashylyǵy jalpy óniminiń kólemi 30,1 mlrd teńgeni qurady. Satý úshin mal men qustyń 22,3 myń tonna eti ótkizildi, 72 myń tonna sıyr súti saýyldy, 60,7 mln dana taýyq jumyrtqasy alyndy.
Tamaq ónimderiniń óndirisi 6,2 %-ǵa ósti, sonyń ishinde irimshik jáne súzbe – 1,6 ese, sary maı jáne spredter – 43 %-ǵa, dıstıllırlendirilgen alkogoldi ishimdikter – 28,7 %-ǵa, mıneraldy sýlar jáne alkogolsiz sýsyndar – 24,5 %-ǵa, tazartylmaǵan ósimdik maıy – 10,7 %-ǵa artty.
Osy aralyqta qurylys jumystary 12,2 mlrd teńgege oryndalǵan. 153 jańa ǵımarattyń qurylysy aıaqtaldy, sonyń ishinde 151 – turǵyn jáne 2 – turǵyn emes maqsattaǵy ǵımarattar.
Paıdalanýǵa berilgen turǵyn úılerdiń jalpy aýdany 25 myń 305 sharshy metr. Turǵyn úıdiń 1 sharshy metriniń qurylysyna jumsalǵan ortasha naqty shyǵyn 126,5 myń teńgeni qurady, byltyr qańtar-naýryzda – 116,4 myń teńge bolǵan edi.
