SQO-da jyl basynan beri 2,5 myń sheteldik ýaqytsha tirkelgen
PETROPAVL. QazAqparat - Soltústik Qazaqstan oblysynda sheteldikter eńbek patentterin jáne kóshi-qon qyzmetimen baılanysty basqa da memleketik qyzmetterdi jyldam resimdeıtin boldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, buǵan byltyr ashylǵan kóshi-qon qyzmetterin kórsetý ortalyǵy septigin tıgizdi. Bul jerde memlekettik qyzmettiń 18 túrin alýǵa bolady.
«Qyzmet kórsetý alańy sektorlarǵa bólinip, kútý oryndarymen, «resepshnmen» jabdyqtalǵan. Qyzmetkerler azamattardy esh kedergisiz qabyldaıdy. Beınebaqylaý júrgiziledi. Jeke tabys salyǵyn tólem termınaldary arqyly tóleýge bolady. Sondaı-aq, múmkindigi shekteýli turǵyndardyń ǵımaratqa kedergisiz kirip memlekettik qyzmet túrlerin alýǵa qolaıly jaǵdaılar qarastyrylǵan. Ǵımaratqa kireberis pandýspen jáne ortalyq qyzmetkerlerin shaqyrýǵa arnalǵan qońyraýmen jabdyqtalǵan», - deıdi SQO PD Kóshi-qon qyzmeti basqarmasynyń bastyǵy polıtsııa maıory Talǵat Ábilov.
Mamandardyń málimetinshe, SQO-na negizinen Ózbekstan, Tájikstan jáne Ázirbaıjan elderiniń azamattary jaldanyp eńbek etýge keledi. Jyl basynan 293 eńbek mıgranty tirkeýden ótken. Olardyń basym bóligi qurylys salasynda eńbek etedi. Sheteldikterdiń aıtýynsha, buryn jumys isteýge ruqsat alý úshin birneshe kún qajet bolsa, qazir bir saǵat ishinde qujat alýǵa bolady.
Kóshi-qon qyzmeti ortalyǵy úsh aı ishinde 3 myńnan astam memlekettik qyzmetti kórsetti. 2537 sheteldik ýaqytsha tirkelip, 54 sheteldikke turaqty turýǵa ruqsat berildi.
