SQO-da jyl basynan beri 17 adam habarsyz ketken
PETROPAVL. QazAqparat – Soltústik Qazaqstan oblysynda tártip saqshylary iz-túzsiz ketken 49 adamdy izdestirip jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, joǵalǵan adamdardy izdeýmen krımınaldy polıtsııa aınalysady. Habar-osharsyz ketkenderdiń 49-y - aldyńǵy jyldary joǵalǵandar. Onyń 38-i - er adam bolsa, 11-i - áıelder. 32-si spırttik ishimdikke áýes.
«Bıyl qańtar aıynda sotqa deıingi tergeýdiń biryńǵaı tizilimine habarsyz ketken 17 adam tirkeldi. Onyń 7 - er adam, 3 - áıel, 6 – jasóspirim. Joǵalǵandardyń segizi maskúnem bolǵan. Olardyń barlyǵyn, sonyń ishinde 14-in bir táýlik ishinde taptyq», - deıdi krımınaldy polıtsııa basqarmasynyń bastyǵy Petr Klımov.
Polıtseılerdiń sózine qaraǵanda, iz-túzsiz ketkenderdi izdeýde kóp jumys atqarylady. Kóp jaǵdaıda úıden ketetinder – ishimdikke áýes jandar. Sondaı-aq týǵan-týystarymen ursysyp, úıden shyǵyp ketetinder de jeterlik.
Krımınaldy polıtsııa basqarmasynyń qyzmetkerleri iz-túzsiz joǵalǵan úsheý - Meıram Smaǵulov, Vıktor Raskatov jáne Baqyt Hamzınany tabý úshin turǵyndardan kómek suraıdy.
Meıram Smaǵulov 1976 jyly týǵan. 2018 jyly qazan aıynda Taraz qalasynan SQO Ǵ.Músirepov aýdanyndaǵy Rýzaevka eldi mekenindegi úıine jolǵa shyqqan. Alaıda sol kúıi jetpegen. Buryn da birneshe ret úıinen habarsyz ketken eken. Spırttik ishimdikke áýes.
Al 36 jastaǵy Vıktor Raskatov 2019 jyldyń 30 qyrkúıeginde Petropavldaǵy úıinen shyǵyp ketken. Boıy - 160 sm shamasynda, dene bitimi ortasha kelgen, kózi jasyl, sarylaý kelgen shashy túse bastaǵan. Sol kúni ústinde sur tústi trıko, qoıý jasyl kúrte, qara bas kıim bolǵan.
Birneshe aıdan beri izdeýde júrgenderdiń biri – Baqyn Hamzına. 1971 jyly týǵan áıel Shal aqyn aýdany Jańatalap aýylyndaǵy úıinen 2019 jyldyń 18 qarashasynda eshkimge aıtpaı shyǵyp ketken. Boıy - 160 sm, ortasha dene bitimi bar, shashyna aq kirgen. Ústinde qyzyl kúrtesi, qara bas kıimi, sur tústi djınsy shalbar bolǵan.
Kórgen-bilgen adam bolsa «102» telefon nómirine nemese SQO PD KPB qyzmetkerlerine 8-(715)-2 39-41-78, 8-707-820-30-29 arqyly habarlasýǵa bolady.
